“සිස්ටම් චේන්ජ්” කිය කිය ජනතාව වටේ යවමින් කළ සෙල්ලම් සියල්ල අද වන විට ටිකෙන් ටික එළිවෙමින් පවතියි. රටේ උපාධිධාරී බුද්ධිමත් තරුණ තරුණියන් රැකියා විරහිතව නිවෙස්වලට වී තම අනාගතයට කුමක් වේ දැයි සිතා ගත නොහැකිව කල් මරද්දී දේශපාලකයන්ට ගොට්ට අල්ලන ඔලමොල නිවට එවුන් රැකියා ලබමින් අයිස් ගසමින් කටයුතු කරයි. රටේ වර්තමානය විනාශ කිරීමේ ප්‍රථම පියවර තැබුවේ චන්ද්‍රිකා බණ්ඩාරනායක රජය විසිනි. ඒ සමුර්ධි සහ ගොවි නියාමකවරුන් ලෙස දේශපාලන පත්වීම් ලබා දෙමිනි. ඊට පෙර පවතී රණසිංහ ප්‍රේමදාස රජයද එසේ පත්වීම් දුන් බවට සඳහන් වන්නේ රුපියල් දහසේ ගුරු පත්වීම්ය. නමුත් අප ප්‍රදේශය තුල එකල පත් වූ බොහෝ ගුරුවරුන් ශ්‍රී ලංකා නිදහස් පක්ෂය වෙනුවෙන් කැපකළ දෙමාපියන්ගේ දරුවන්ය.
ජවසම්පන්න දැනුමැති වටිනා තරුණ පරපුරක් සිටියදීත් ඔවුන්ගේ ඵලදාව නෙලා ගැනීමට කටයුතු නොකර ධනය බලය ඇත්තවුන්ට දෙකට නැමෙන උන්ගේ අය පමණක් රැකියා සඳහා යෙදවීම අද මේ සිස්ටම් එකේම ඇති සාමාන්‍ය දෙයක් බවට පත්ව තිබේ. දැන් උගතුන් වෙනුවට දූෂිත රස්තියාදුකාර පරපුරක් බිහිව තිබේ. එයට වගකිව යුත්තේ අතීතයේ දශක කිහිපයක සිටම රට පාලනය කරමින් දේශපාලනයේ නියුතු දේශපාලන බලවතුන්ය. ඔවුන්ටම එකතු වූ තවත් දූෂිත රාජ්‍ය නිලධාරීන් මේ දූෂණ ක්‍රමයට වග කිව යුතුය.
අපට මෑතකදී අසන්නට ලැබුණේ ඛනිජ තෙල් සංස්ථාවේ ආරක්ෂක නිලධාරියෙකුගේ වැටුප රුපියල් ලක්ෂ 1.5කට ආසන්න වන බවයි. මෙවැනි වැටුපක් ලබන්නේ දේශපාලන බලයෙන් රැකියා ලබා ගත්තවුන්ය.නමුත් අවුරුදු ගණන් විශ්ව විද්‍යාල වල ඉගෙන ගත්, රැයක් දවාලක් නැතිව මහන්සිවෙලා ඩිග්‍රි ගහලා කට්ට කාලා රජයේ රැකියාවක් ගන්න සංවර්ධන නිලධාරියාගේ පඩිය ආසන්න වශයෙන් රුපියල් 55,000ක් පමණ වෙයි.
රටේ අනාගතය වෙනුවට, තමන්ගේ දේශපාලන අනාගතය, පක්ෂයේ අනාගතය වෙනුවෙන් රාජ්‍ය සේවයට නිලධාරින් බදවා ගත්තේ ඉවක් බවක් නොමැතිවය. රජයේ ආයතනවලට සහ අනෙකුත් සංස්ථා මණ්ඩලවලට ඵලක් නැති නිකමුන් පිරිසක් නිකරුනේ පත් කිරීමේ ප්‍රතිඵල වශයෙන් වර්තමානයේ ආයතනයක ඵලදායී සේවාවක් ජනතාවට ලබා ගැනීමට හරිහමන් නිලධාරියෙක් නැතිව ගොස් තිබේ. ඉන්නා නිලධාරීන්ගෙන් බාගෙට බාගයක් දේශපාලන පත්වීම් තුළින් පැමිණි පුස් මොළ ගෙඩි පමණක් වන අතර ඔවුන් වැඩ කරනුයේ ඔවුන් ආදරය කරන දෙශාපලන් නායකයා සහ පක්ෂය දිනවීම වෙනුවෙනි.
අපට ලද තොරතුරුවලට අනුව විදුලිබල මණ්ඩලයේ මනු කියවන්නෙකුට ද නිවැරදිව මනු කියවීම සඳහා නැවත ගෙවීමක් කරනු ලබයි. මෙසේ කටයුතු කරන්නේ කුමන අරමුණක් සඳහාද?.රජයේ මුදල් මෙසේ අවභාවිත කරන තෙක් මේ සම්බන්ධ බලධාරීන් තවමත් කිසිදු පියවරක් ගෙන නොමැති බව නම් ගම්‍ය වේ. කෙසේ නමුත් ජනතාවගෙන් බදු මුදල් වල අගය ඔවුන්ට නොදැනෙන්නේ, මේ කිසිදු මුදලක් ඔවුන්ගේ සාක්කුවෙන් නොගෙවන බැවිනි.
රටකට වැදගත්ම වන පුද්ගලයා ගුරුවරයා ද?මනු කියවන්නා ද? තෙල් සංස්ථාවේ ආරක්ෂක නිලධාරියා ද?යන පැනය ඔබගෙන් නැගුවහොත් ඔබ දෙන පිළිතුර කුමක් වේද?ගුරුවරයා කියන චරිතය සම්පූර්ණ පද්ධතියක මුල් පුරුකය.ගුරුවරයා යන චරිතය ලෝකයක් ගොඩනැගීමට සමත් චරිතයක් බව ඕනම නූගත් මනුස්සයෙකුට වුණත් තේරෙන දෙයක් වුනත් ශ්‍රී ලංකාවේ පාලක පන්තිය එදා සිටම එය තේරුම් ගෙන නැත. ඒ හේතුවෙන්ම මේ වන විට ගුරු පරපුරද දූෂණය වී අවසන්ය. දැන් ඔවුන්ද මුදලාලිලා වී අවසන්ය.
අමාරුවෙන් ඉගෙනගත් දේට ලැබුණ රැකියාව කරගෙන සිටින රජයේ සේවකයන්ට පඩි වැඩි වීමක් හෝ කිසිදු දීමනාවක් අනෙක් හොරුන්ට තරම් නොමැත.එවැනි නිලධාරීන් රට තුළ ඇති ආර්ථික දුර්වලකම හමුවේ තම පවුල ජීවත් කරවන්නේ කෙසේද?.දරුවන්ගේ පොත් පෑන්වල මිල දෙගුණයෙන් තුන්ගුණයෙන් අහස උසට ඉහළ යද්දී ඔවුන් රෑ තිස්සේ කඳුලු බොන්නේද ගැටළු විසදා ගැනීමට නොහැකිවය.
මාසික වැටුපක් ලබන රාජ්‍ය සේවකයාද එසේ නම්, කුලියක්වත් සොයා ගැනීමට නොහැකි රටේ අසරණ මිනිසුන් දහස් ගනනාවක් සිටින බව සියලු සැප සම්පත්වලින් අනූන දේශපාලන, මාණ්ඩලික ශ්‍රේණියේ නිලධාරීන්ට නොතේරෙන්නේ, ඔවුන් සතුව තිබෙන ආත්මාර්ථකාමී පරදේශක්කාර ගති ලක්ෂණ නිසාමය.
අවසන් වශයෙන් මා මෙසේ ලියමි. අය වැය සම්මත කරගන්නා තෙක් ජෝෂප් ස්ටර්ලින් ගුරුවරියන්ගේ සාරියේ එල්ලුණේය. සාරි පොටේ එල්ලුණු ජෝෂප් දැන් නිහඩය. අය වැය දැන් සම්මත වී අවසන්ය. නමුත් යහපත් ගුරු පරපුරක් නිර්මාණය කිරීමට ජෝෂප් ස්ටර්ලින්ට නොහැකි විය. ගුරුවරු දූෂිත වන්නේද ජෝෂප්ලාගේ කාලයේමය.