එළැඹෙන ජුනි මාසය වනවිට මෙරට උසස් පෙළ සහිත පාසල් ඩිජිටල්කරණයට ලක්කරන බවට අධ්‍යාපන අමාත්‍ය සුසිල් ප්‍රේමජයන්ත මහතා පවසා ඇති බව වාර්තා වේ.
ඒ අනුව නව තාක්ෂණය සමඟ සෘජුව සම්බන්ධ වෙමින් අධ්‍යාපන කටයුතු කරගෙන යාමට දරුවන්ට අවස්ථාව සලසා දෙන බවට අමාත්‍යවරයා වැඩිදුරටත් සඳහන් කර තිබේ.
ඔහු මේ බව පැවසුවේ අද (05) යාපනය හින්දු විද්‍යාලයේ පැවති උත්සව අවස්ථාවකට එක්වෙමිනි.
එහිදී මෙරට උසස් පෙළ සහිත පාසල් 3,000ක් ඩිජිටල්කරණයට ලක් කෙරෙන බවත්, මීට අදාළව ගුරුවරුන් පුහුණු කිරීම එළැඹෙන මාර්තු මාසයේ සිට ආරම්භ කරන බවත් අමාත්‍යවරයා ප්‍රකාශ කළේය.
රටේ සියලු දරුවන්ට අධ්‍යාපනයේ සමාන අවස්ථා අත්පත්කරදීම අධ්‍යාපන අමාත්‍යාංශයේ අරමුණ බව ද අමාත්‍යවරයා වැඩිදුරටත් ප්‍රකාශ කර තිබේ.