සොරාගත් යතුරුපැදියක යමින් කඩුවක් පෙන්වා නිවාස බිඳ දේපොළ කොල්ලකෑමට හා මහමග ගමන් ගන්නා කාන්තාවන් බියගන්වා අත්බෑග් කොල්ලකෑමට පුරුදුවී සිටි සැකකරුවන් දෙදෙනෙක් අත්අඩංගුවට ගෙන ඇති බව වාර්තා වේ.
අදාළ සැකකරුවන් අත්අඩංගුවට ගෙන ඇත්තේ හෙරොයින් මිලිග්‍රෑම් 4300ක් ද සමග බව මහරගම පොලීසිය පවසයි.
ඒ සමග කොල්ලය සඳහා භාවිත කළ යතුරුපැදිය, කඩුවක්, අත් බෑග් දෙකක්, වටිනා ජංගම දුරකථන 05ක්, හැඳුනුම්පත් 02ක් ඇතුළු භාණ්ඩ තොගයක් පොලීසිය විසින් සොයාගෙන ඇති බව සදහන්.
මහරගම පොලිස් වසමේ මහමග ගමන් ගන්නා කාන්තාවන්ගේ අත්බෑග් කොල්ලකෑමේ සිද්ධින් 05ක් සම්බන්ධයෙන් ලද පැමිණිලිවලට අනුව කළ විමර්ශනයේදී සැකකරුවන් අත්අඩංගුවට ගෙන තිබේ.
සැකකරුවන් දෙදෙනා මීගොඩදෙනිය ප්‍රදේශයේ නිවසක සැඟව සිටියදී ඊයේ (01) අත්අඩංගුවට ගෙන ඇත.
සැකකරුවන් කොට්ටාව, හෝමාගම, මහරගම, මිරිහාන පොලිස් වසම්වල කොල්ලකෑම් විශාල ප්‍රමාණයක් සිදුකර ඇති බවට ද තොරතුරු හෙළිවී ඇති බවට පොලීසිය පවසයි.