දේශපාලනය නිසා සහ විවිධ පාවා දීම් නිසා අද අපේ රට තුල දරුණු සමාජ විනාශයක් සිදු වෙමින් තිබෙන බව තවමත් බොහෝ දෙනෙකු තේරුම් ගෙන නැත. සාමාන්‍යයෙන් හොද ආර්ථික මට්ටමක සිටින සහ මාසිකව ස්ථීර වැටුප් ලබන ලක්ෂ 30 ක් පමණ වන ප්‍රමාණයකට මෙය තවමත් දැනී නැති බැවින්ම සාමාන්‍ය ජනතාව දුක් විදිති. විවිධ දේශපාලකයන් තමාට වන්දනා කිරීම වෙනුවෙන් විවිධ කල්ලි නිර්මාණය කර තිබේ. එසේ නිර්මාණය වූ කල්ලි විවිධ සමාජ විරෝදී ක්‍රියාකාරකම් වල නිරතවන්නේ බොහෝ විට තම දේශපාලකයාගේ ඕනෑ එපාකම් පිරිමසා ගැනීමටයි. සමහර විට දේශපාලකයාටත් නොදැනීම ඔවුන් තම අකටයුතුකම් කරගෙන යන අතර එයින් නොදැනීම දේශපාලකයාගේ දේශපාලන ජීවිතයද අවසන් වෙයි. එසේම රාජ්‍ය සේවයේ මාණ්ඩලික ශ්‍රේණියට අයත් නිලධාරීන්ද මේ විනාශයට 50% ක් වග කිව යුතුය. දේශපාලකයාට වඩා ජනතාව පීඩා විදින්නේ රාජ්‍ය සේවයේ මාණ්ඩලික සහ මාණ්ඩලික නොවන නිලදාරීන්ගේ වරදිනි. බොහෝ විට ග්‍රාම සේවක ඇතුළු ගම තුල සේවය සදහා පත් කර තිබෙන නිලදාරීන්, ප්‍රාදේශීය ලේකම්වරු, මෙන්ම ශ්‍රී ලංකා පොලිසියද ජනතාව පීඩාවට පත් කරති. ඔවුන්ද දේශපාලනීකරණය වී තිබේ. පසු ගිය දිනක එක්තරා දේශපාලන පක්ෂයක මන්ත්‍රීවරයෙකුගේ ලේකම් වරයෙකු මා සමග යම්කා සාකච්ඡවකදී ‘මල්ලි ඕකුන් ‘, “කාලකන්නි UNP කාරයෝ” ලෙස සදහන් කරන ලදී. ඒ ප්‍රකාශය සමග ශ්‍රී ලංකාවේ අනාගතය කෙසේ වේවිද යන්න සොයා බැලීම සදහා මේ ලිපිය දිග හැරේ.
කුමන රජයක් පැවතියද රජයට සම්බන්ධ දේශපාලන කල්ලි වල බොහෝ අවස්තා වල දක්නට තිබෙන්නේ ම්ලේච්චත්වයයි. ගම් වල සිටින අදාළ පක්ෂවලට අයත් සාමාන්‍ය සාමාජිකයන්ද එසේමය. එය පක්ෂ බේදයකින් තොරවම දැකිය හැකිය. තම දේශපාලකයාගේ ජයග්‍රහණය සැමරීම වෙනුවෙන් නොයෙකුත් ජයකෙහෙලි නංවන ඔවුන් නොදන්නා, තේරුම් නොගත් කරුණු ගණනාවක් තිබේ. එනම් ලෝකයේ දේශපාලනය සහ ශ්‍රී ලංකාවේ දේශපාලන විකුර්ති භාවය නිසි ලෙස හදුනා නොගැනීමයි. එක් වරක් ජයග්‍රහණයෙන් ජයඝෝෂා නංවන ඔවුන් තම ප්‍රතිවාදීන්ටද පහර දෙයි. එහෙත් අවුරුදු ගණනාවකින් පසුව හෝ එම ප්‍රතිපලය තමන්ටද අත්විදින්නට සිදුවන බව මේ අසරණ මිනිසුන් නොහොත් දේශපාලකයාගේ වුමනාවට බිහි කරගත් චන්ඩින්ට නොපෙනේ. තමන් වරදක් කල විට දේශපාලකයාගේ බලපෑම් මත එයින් බේරී එන දේශපාලන සගයන්ට උත්තර ලැබෙන්නේ කවදා හෝ එම පක්ෂය පරාජයට පත් වීමෙන් පසුවය.
දේශපාලන වුමනාවන් මත යුක්තිය ඉටු නොවූ මිනිසුන් තම වාරය එන තෙක් බලා සිටින්නේ එම පලිය ගන්නටයි. එවිට වරද කල පාර්ශ්වයටද ම්ලේච්ඡත්වයෙන්ම පිළිතුරු ලැබෙයි. එපමණක් නොව, ගොරක දඩමස් වීමද දක්නට ලැබෙයි. මිනිසුන්ට තවමත් නොදැනුනාට පවතින ආර්ථික ප්‍රශ්නයට විසදුම් නොලැබුනහොත් කෝටිපතියන් පමණක් ඉතිරි වී මේ සියලුම දේශපාලන ගැත්තන්ටද කුසගින්නේ සිටීමට සිදු වේ. රජයේ නිලධාරීන්ට වැටුප්වත් ගෙවා ගැනීමට නොහැකි වේවි. මේ සියල්ලම පමණක් නොවේ, ආර්ථික දුෂ්කරතා මත මිනිසුන් තව දුරටත් ම්ලේච්ඡවනු ඇත. පරිසරය තව දුරටත් විනාශ වී උෂ්ණත්වය වැඩි වී වර්ෂාව පවා අහිමි වනු ඇත. විදුලිය නොමැතිව යනු ඇත. දුරකථන විසංදී වනු ඇත. මේවා තේරුම් ගැනීමට හැකි ලෙස බහුතරයක් මිනිසුන්ගේ මනසද විසන්දි වී තිබීම වෙනස් නොකලහොත් සිදු වන විනාශය කිසිවෙකුටත් සිතා ගත නොහැකි වනු ඇත. අසාධාරණය නිසා මිනිසුන්තුල ඇති වූ පීඩාව සහ අසහනය ඔවුන් පිට කරනුයේ කැරළි සහ කෝළාහල වලිනි. දැනට මතුවෙමින් පවතින ගැටලුවලට කෙටිකාලීන සහ දීර්ගකාලීන විසදුම් ලබා නොදුනහොත් ජනසමාජයේ විනාශය සිදු වන අයුරු කිසිවෙකුටත් හිතා ගැනීමට නොහැකි වේ. අභාග්‍ය සම්පන්නම කරුණ නම් අප දකින අනාගත බිදවැටීම් කිසිවක් වගකිව යුතු රාජ්‍ය ආයතන සහ ඒවායේ නිලධාරීන්ට තවමත් නොදැනීමයි.
මිනිසාගේම වරද සහ යහපත් දර්ශනයක් නොමැති වීමෙන් මිනිසාම විවිධ මිනිසුන් සමග පැටලෙති. තම යහළුවා වැරදි වුවත්, නිවැරදි වුවත් ඔහු වෙනුවෙන්ද පෙනී සිටිති. බුදු දහම ඉහලින්ම තිබෙන මිනිසුන් සිටින රටේ මිනිසුන්ගේ ම්ලේච්චත්වය කෙතරම් දරුණුද යත් , එකම ගමේ උන් විවිධ දේශපාලකයන් , පක්ෂ වෙනුවෙන් මරා ගනිති. එපමණක්ද නොව දේශපාලනය නොකරන මිනිසුන්ට පවා ඔවුන් විවිධ කරදර සිදු කරන්නේ තම දේශපාලන හිතවත්කම් නිසාය. සමහරු බැන වදින්නේ, “කාලකන්නි UNP කාරයෝ”, “කාලකන්නි පොහොට්ටු කාරයෝ”, “කාලකන්නි ජෙප්පෝ “ ලෙසිනි. සමාජ ජාලවල මේවා දක්නට ලැබෙන්නේ මානව වාදී මිනිසුන්ට අප්‍රසන්න දසුන් එක් කරමින් වන අතර ප්‍රතිමත දරන පුද්ගලයන්ට වෛරයක්ද එක් කරමිනි.
එසේම මේ දේශපාලන විකුර්තිකරුවන් මෙතෙක් කල් කලේ ද තම හිතවතුන් සහ තමන්ගේ නායකයා පාර්ලිමේන්තුව වෙත යැවීමය. තමන්ගේ දේශපාලකයා චන්ඩියෙක්ද, හොරෙක්ද, දූෂිතයෙක්ද යන්න තෝරා ගෙන තම මනාපය සහ මහන්සිය මත දේශපාලනයේ ඔවුන් බලාපොරොත්තු වන ඉලක්කය වෙත තල්ලු කිරීම සිදු විය යුතු වුවත්, එවැන්නක් මේ සියලු පක්ෂවලට වන්දි භට්ටකම් කරන්නා වූ මිනිසුන්ට අවශ්‍ය නැත. ප්‍රජාතන්ත්‍රවාදී නිදහස අහිමි කරන ඔවුන් සත්‍ය නිසි ලෙස වටහා නොගැනීම හේතුවෙන් තම මනාපය තුලින්ම තම දේශපාලකයා ඉහලින් තබමින් ඔහුගේ හොර, මැරකම් සහ දූෂිත ක්‍රියාවලීන් දිගින් දිගටම කරගෙන යාමට සහාය දෙයි.
පරිසරය විනාශ කරති. අරක්කු ඇතුළු විවිධ නීත්‍යානුකූල සහ නීතිවිරෝදී මත්පැන් වලට ඇබ්බැහි වෙමින් පැරණි වෙහෙර විහාර වල තිබෙන නිධන් වස්තු කොල්ල කමින් ඒවායෙහි විවිධ ඉදිකිරීම් කරමින් ඒවාද විනාශ කරමින් සිදු කරන දේශද්‍රෝහී ක්‍රියාකාරකම් වලට පිළිතුර ලෙස සොබා දහම මගින්ම ජනතාවට දුක සහ වේදනාව උරුම කර දී ම්ලේච්ඡත්වය උරුම කර දෙමින් සිටිති. බහුතර ජනතාව ආදරය කරන්නේද මේ කෲර , ම්ලේච්ඡ ස්වාභාවයටයි. කෲර , ම්ලේච්ඡ සහ අයුක්ති සහගත වාචික සහ සහ වාචික නොවන ක්‍රියාකාරකම් වලින් බැටකන මිනිසුන් නැගී සිටි විට ජනසමාජයේ පැවැත්මට බාධා ඇතිවන අතර කෲර , ම්ලේච්ඡ මිනිසුන්ගේ අවසානය ද සනිටුහන් වන අතර තවත් අවුරුදු ගණනාවකින් නැවතත් එහි අනික් පාර්ෂවය නැගී සිටී. පොලිස් නිලධාරීන් සාමාන්‍ය ජනතාවගේ ප්‍රහාර වලට ලක් වන්න සේ රාජ්‍ය නිලදාරීන්, වෛද්‍යවරුන්, නීතීඥවරුන් මෙන්ම හාමුදුරුවන් වහන්සේලා ලෙස පෙනී සිටින අයටද සාමාන්‍ය ජනතාව පහර දෙනු ඇත. ඒ සියල්ල දෙස බලන විට අපට ශ්‍රී ලංකාවේ හෙට දවස ගැන දැඩි බියක් දැනේ. පාලක පන්තියට සහ අනෙකුත් රාජ්‍ය සේවකයන්ට එවැන්නක් නොතේරෙන්නේද ? එසේ නොමැතිනම් එම ගැටලුවලට සැලසුම් ක්‍රියාත්මක වන්නේද? යන්න අපට ගැටළු සහගතය.
දේශපාලනය අවශ්‍ය නැති තැන් වලටද දේශපාලනය රිංගා ඇත. ගමේ ග්‍රාමීය සමිතිය, කුලඟන සමිතිය, සමූපකාර සමිතිය පවා දේශපාලනීකරණය වී අවසන්ය. මේ දේශපාලන විකුර්තිභාවයට වගකිව යුත්තේ චන්ද දායකයාමය. අද ප්‍රජාතන්ත්‍රවිරෝදී ක්‍රියා කරන පුද්ගලයාට පිළිතුරු ලැබෙන්නේ තවත් අවුරුදු ගණනාවක් ගිය විටය. එවිට ඔවුන්ට තමන් අතීතයේ කල කී දෙයෙහි ප්‍රතිපලය ලැබෙන විට , එකල පවතින ආණ්ඩුවලට බැන බැන සිටින්නේ තමන්ට තමන්වත් හදුනා ගැනීමට නොහැකි ලෙස තමන්ගේ මනස විකුර්තිව තිබෙන නිසාය.
එබැවින් ප්‍රගතිශීලී මිනිසුන්ට මේ දේශය බේරා ගැනීමට කල යුතු දේවල් බොහෝ තිබේ. එහෙත් විකුර්ති දේශපාලන මුහුණුවරක් තිබෙන මෙරට බොහෝ ජනතාවට මේ කිසිවක් නොතේරීම නිසා මෙය පිරිසිදු දේශයක් කිරීම ලේසි පහසු කටයුත්තක් නොවනු ඇත. එහෙත් එය කෙසේ හෝ නොකළහොත් , හෙට දවසේ මෙරට මිනිසුන් මිය යන්නේ ම්ලේච්ඡත්වය නිසාය. මේ වන විට මනසින් ම්ලේච්ඡ වී සිටින බොහෝ දෙනා වැඩි කලක් නොගිහින් ක්‍රියාවෙන්ද ම්ලේච්ඡ වනු ඇත. එවිට මිය යන්නේ ඔබේ හෝ මගේම හිතවතෙකු ආදරනීයෙකු විය හැකිය. එවිට ලෝකයා ශ්‍රී ලංකාවට ඇඟිල්ල දිගු කරනුයේ පකිස්තානය හෝ ඇෆ්ගනිස්තානයටත් එහා ගිය ම්ලේච්ඡ දේශයක් ලෙසිනි. ඔබ ඔබේ දේශපාලනය කරන්න. එහෙත් නීත්‍යානුකූල වන්න. සත්‍යවාදී වන්න. එසේ නොමැති වුවහොත් ඔබට ප්‍රතිපල ලැබෙන විට එය දරාගැනීමට හෝ ඔබව බේරා ගැනීමට කිසිවෙකුත් ඉදිරිපත් නොවනු ඇත. එලෙස බලන විට අප පක්ෂ සහ පාට වලින් බෙදී වෙන් වී ගොස්ය. අවසන එම පාට කන්නාඩි ගලවා, පක්ෂ ලකුණ පැත්තකින් එම සියලු ගොඩවල් වෙන් කර බලු විට එක්ෂත් ජාතික පක්ෂය , සමගි ජනබලවේගයේ ද , ශ්‍රී ලංකා නිදහස් පක්ෂයේ ද , පොදු ජන පෙරමුණේ ද, ජනතා විමුක්ති පෙරමුණ ඇතුළු සියලු පක්ෂවල සිටින්නේ ශ්‍රී ලාංකිකයන්ය. එසේ බැලු විට අවසානයේ අප සියලෝම කලකන්නියන් වී තිබේ. එබැවින් අපි ඔබ සියලු දෙනාම ම්ලේච්ඡත්වය ලෝකයෙන් තුරන් කිරීමට අත් වැල් බැදගමු.
ශ්‍රී නිශ්ශංක මායාදුන්න.