නිවසක් බිඳ රුපියල් කෝටි දෙකයි ලක්ෂ හැට අටක් පමණ වටිනා රන්, මුතු, මැණික් හා භාණ්ඩ තොගයක් සොරා ගත් සැකකරුවන් දෙදෙනකු වැලිකඩ, මණ්ඩාවිල ප්‍රදේශයේදී පොලිසිය විසින් අත්අඩංගුවට ගෙන ඇති බව වාර්තාවේ.
අත්අඩංගුවට ගත් සැකකරුවන්ගෙන් ප්‍රස්න කිරීමේදී ඔවුන් දෙදෙනා විසින් සොරා ගත් වටිනා මැණික් ගල් 924ක්, රන්මාල 5ක්, අත්පලදනා 7ක්, රන් කරාබු ජෝඩු 4ක්, රන් වළලු 4ක්, රන් පෙන්ඩන් 3ක්, රන් මුදු 6ක්, ලැප්ටොප් පරිගණකයක්, විදුලි උපකරණ, පිත්තල භාණ්ඩ හා විදෙස් මත්පැන් බෝතල් 10ක් ඇතුළු භාණ්ඩ තොගයක් වැලිකඩ පොලිසිය මගින් සොයාගෙන තිබේ.
කලපුවාවල ප්‍රදේශයේ පිහිටි මෙම නිවසට පැන භාණ්ඩ සොරා ගත් සැකකරුවන් තලංගම හා මාලබේ ප්‍රදේශවල පදිංචි වයස අවුරුදු 25 හා 30 වයස්වල පසුවන බව පොලිසිය සදහන් කරයි.
අත්අඩංගුවට ගත් සැකකරුවන් අද (16) අධිකරණයට ඉදිරිපත් කිරීමට නියමිතව ඇති අතර වැලිකඩ පොලිසිය වැඩිදුර පරීක්ෂණ පවත්වනු ලබයි.