ජේෂ්ඨ මාධ්‍යවේදී චමුදිත සමරවික්‍රම මහතාගේ නිවසට පසුගිය පෙබරවාරි මස 14 වනදා ප්‍රහාරයක් එල්ල වූ අතර එම ප්‍රහාරයත් සමගම චමුදිතගේ ජීවිතයට එල්ල වූ තර්ජනය සම්බන්ධයෙන් ඔහුට රාජ්‍ය ආරක්ෂාව ලබා දෙන මෙන් ඉල්ලා කැස්බෑව මහේස්ත්‍රාත් අධිකරණයට ඉදිරිපත් කල මෝසමට අදාළව නඩුව අද ( 25) එම අධිකරණයේදී කැඳවන ලදී.
අගතියට පත් වූ චමුදීත සමරවික්‍රම මහතාගේ අයිතිවාසිකම් වෙනුවෙන් ජනාධිපති නීතිඥ කුවේර ද සොයිසා ප්‍රමුඛ නීතීඥ කණඩායමක් පෙනී සිටි අතර ඔවුන් අධිකරණය අමතමින් “මේ ප්‍රහාරය හා සම්බන්ධ කාරණාව පිලිබඳව කැරුණු දක්වමින්, මේ සිද්ධිය සිදු වී මේ වන විට මාස දෙකකට ආසන්න වුවත් තවමත් කිසිදු සැකකරුවෙකු අත් අඩංගුවට ගෙන නොමැති බවත් පොලිසියේ විමර්ශන කටයුතු පිලිබඳව කිසිදු අකාරයකින් සැහීමකට පත් විය නොහැකි බවද”, ප්‍රකාශ කරන ලදී.
කැස්බෑව මහේස්ත්‍රාත්තුමා පොලිසිය අමතමින්, “ මෙපමණ කාලයක් ගත වීත් සැකකරුවන් අත් අඩංගුවට නොගත්තේ ඇයි” දැයි පොලිසියෙන් ප්‍රශ්න කරන ලද අතර පිළිතුරු ලබා දෙමින් පොලිසිය කියා සිටියේ, ලබා ගන්නා ලද CCTV දර්ශන මොරටුව විශ්වවිද්‍යාලය වෙත යොමුකර තිබෙන බවත් එහි ප්‍රතිපල ලැබුණු වහාම එහි ඇති අංක තහඩු වලට අනුව ඉදිරි කටයුතු සිදු කරන බවයි.
ඒ අනුව සැකකරුවන් වහාම අත් අඩංගුවට ගෙන අධිකරනයාට ඉදිරිපත් කරන ලෙස කැස්බෑව මහේස්ත්‍රාත් විසින් පොලිසියට නියෝග කල අතර නඩුව නැවත අප්‍රේල් මස 27 වැනි දිනයට කල් තබන ලදී. ඒ අවස්ථාවේ වින්දිත සමරවික්‍රම මහතාගේ අයිතිවාසිකම් වෙනුවෙන් පෙනී සිටි ජනාධිපති නීතිඥ කුවේර ද සොයිසා මහතා අධිකරණය අමතා ප්‍රකාශ කලේ එදිනට සැකකරුවන් අත් අඩංගුවට ගෙන නොතිබුණහොත් මෙහි පරීක්ෂණ කටයුතු සිදු කිරීම සදහා රහස් පොලිසියට භාර දීමට නියෝගයක් නිකුත් කරන ලෙස ඉල්ලීමක් ද කරන ලදී.
ඒ අනුව මෙම නඩුව නැවත 2022 අප්‍රේල් මස 27 වැනි දින විවෘත අධිකරණයේදී කැඳවීමට නියම කරන ලදී.
රාවණා සටහන
චමුදිත සමරවික්‍රම මහතා තමන්ට තර්ජන තිබෙන බව 2021 ජුලි මස දී ද පොලිස්පති වරයා වෙත පැමිණිලි කර තිබේ. මෙම සිද්දිය වන්නේ එම පැමිණිල්ලෙන් මාස 7 කට පමණ පසුවයි. මීට පෙරද පැමිණිලි කර තිබියදීත් මෙසේ පහරදීමක් සිදුවීම සහ එම පහර දීම පිලිබදව වීඩියෝ සාක්ෂිද තිබෙන බැවින් පොලිසියට ඇගිල්ල දිගු කිරීමට ඉඩ නොතබා නිසි ලෙසම විමර්ශනයන් සිදු කිරීම පොලිසිය පැත්තෙන් සිදු විය යුතු දැවැන්ත කටයුත්තකි. එසේ නොමැතිවීමෙන් සිදුවන්නේ ජනතාව විවිධ කෝණ වලින් බලා වැරදි අයුරින් තීරණය ගැනීමයි.
ඒ හා සබැඳි සියලුම පුවත් මෙතනින් ගන්න