යසස්වි ජයිස්වාල් ක්‍රියාත්මක කළ සිය ටෙස්ට් තරග දිවියේ හොඳම ඉනිම හේතුවෙන් සංචාරක එංගලන්ත කණ්ඩායමට එරෙහිව ඊයේ විශාකාපට්නම්හිදී ආරම්භ වූ දෙවැනි ටෙස්ට් තරගයේ පළමු ඉනිම වෙනුවෙන් කඩුලු 6ක් දැවී ලකුණු 336ක් රැස් කිරීමට ඉන්දීය කණ්ඩායම සමත් විය.
පළමු දිනයට තරගය නතර කරන විට ජයිස්වාල් ලකුණු 176ක් සහ රවිචන්ද්‍රන් අශ්වින් ලකුණු 5ක් රැස් කරමින් නොදැවී කඩුල්ලේ රැඳී සිටියහ. පන්දු 257කට මුහුණ දුන් ජයිස්වාල් හතරේ පහර 17ක් සහ හයේ පහර 5ක් එල්ල කළ අතර, ඊයේ ඔහු වාර්තා කළේ සිය දෙවැනි ටෙස්ට් ශතකයයි. මින් පෙර ඔහු පසුගිය වසරේ කොදෙව් පිලට එරෙහිව ලකුණු 171ක් රැස් කර තිබිණි.
කෙසේ වෙතත් දැවී ගිය ඉන්දීය පිතිකරුවන් 6 දෙනා අතුරින් ශුබ්මන් ගිල් රැස් කළ ලකුණු 34 ඉහළම ලකුණු සංඛ්‍යාව විය. නායක රෝහිත් ශර්මාගේ ඉනිම ලකුණු 14කට සීමා විය. ඊයේ ඉන්දියාව වෙනුවෙන් ටෙස්ට් වරම් ලැබූ රාජත් පටිදාර් ලකුණු 32ක් රැස් කළ අතර, අක්සර් පටෙල් සහ ශ්‍රෙයාස් අයියර් ලකුණු 27 බැගින්, ශ්‍රීකර් භාරත් ලකුණු 17ක් ඉනිමට එක් කළහ. පන්දු යැවීමේදී රෙහාන් අහමඩ් සහ ඊයේ ටෙස්ට් වරම් හිමි කර ගත් ෂොයිබ් බෂීර් කඩුලු 2 බැගින් දවා ගත්හ.
අද තරගයේ දෙවැනි දිනයයි.
(දිනමිණ )