දැන් තිබෙන්නේ ගිනි කුරක් ගැසීමට පමණි.  අර්බුධයේ දෙවෙනි පිපිරිම රජයේම සැලසුමක් ද?. උදා වන්නේ කළු ජුලියද?

මේ අපූරු ලියවිල්ල අරගලකරුවන්ගේ සමාජයේ වට්ස් ඇප් සමූහයන් තුල හුවමරු වෙමින් තිබේ. නමුත් මේ ලියවිල්ලේ හිමිකරුවෙක් නැත. ජාතිආගම් පක්ෂ බේදයකින් තොරව ලිය ඇති මේ අපූරු ලියැවිල්ල තුල මේ වනවිට සිදු වූ සහ සිදුවිය හැකි බොහෝ දේ ගලපා තිබේ. මෙය සමාජ විද්‍යාත්මක බුද්ධිමත් විග්‍රහයකි.

ලංකාවේ #GotaGoHome2022  Trending වන්නේ මිරිහානේ ජනාධිපති පුද්ගලික නිවස වට කල දා සිටයි. ඒ වට කලේ පැය 13 ක් කරන්ට් කැපීමේ පීඩනය ඉවසා ගත නොහැකිව බව ඒ තුල සැඟවුණ තිත්ත ඇත්තයි.

මෙම විරෝධය system change එකකට යන පාරක් ලෙස යොදා ගැනීමට ඒ දිනවල ගෝල්ෆේස් අරගලය ඇරඹිණි. එය යම් දුරකට යහපත් ප්‍රථිපල ඇති කරමින් ඉදිරියට ගමන් කරන්නටද විය.

දැන් අර්බුදය හා අරගලය ඇත්තේ භයානකම අවධියක බව මගේ කියවීමයි.

අරගලයේ එක් කූඨප්‍රාප්තියක් මැති ඇමති මන්ත්‍රී නිවාස හා මැති ඇමති ජීවිත මතින් අවසන් විය. එය යහපත් යැයි කියන්නට නොහැකි වුවද එය සාපේක්ෂව සමාජයට ඇති කල බලපෑමේ ස්වරූපය අවම විය. කොටින්ම එය 83 කළු ජූලියක් නැවත නිර්මාණය නොවීමට හේතු විය. එහෙත් මැති ඇමති නිවාස ගිණි තැබීම් හා ඔවුන්ගේ ජීවිත හානි තුල අරගලය හා අර්බුදය වෙනම මානයකට විතැන් කිරීමට ඔවුන්ගේ පැළැන්තිය අපූරු ගේමක් ගැසුවේය.

රනිල් එන්නේ රාජපක්ෂලාව බේරා ගැනීමට කියා මා නම් විශ්වාස කරන්නේ නැත. රනිල් එන්නේ සමස්ථ පන්තිය බේරා ගැනීමට ය. මැති ඇමති මන්ත්‍රී නිළධාරී  ප්‍රභූ පැළැන්තියේ ආරක්ෂාව රනිල් විසින් තහවුරු කොට ඇත. ඊට ඔහු අපූරු උපක්‍රමයක්ද යොදා ගත්තේය. පළමු ප්‍රකාශයේ ම තමන්ට මුදල් අච්චු ගැසීමට සිදු වන බවත් ඊට හේතුව රජයේ සේවකයන්ට පඩි ගෙවීමට සිදු වීම බවත් ඔහු සඳහන් කලේය. සාමාන්‍ය මහජනතාව අරගලය රජයේ සේවකයා දෙසට හැරවීය. මේ අතර අපූරුවට කෝප් කමිටුව (කාලයක් මාධ්‍යයට විවෘත නොවූ) තුලින්‍ රාජ්‍ය ආයතන වල නාස්ති වංචා දූෂණ තොග පිටින් එළි කරන්නට යෙදිණි. ඒ වංචා නාස්ති දූෂණ පිටුපස වූ දේශපාලකයින් එළි නොවූ අතර , ඇතැම් ප්‍රශ්න කිරීම් කලේද ඒ ඒ කාල වල ආණ්ඩු බලය ඉසිලූ කැබිනට් ඇමතිවරුන් වීම තුල මේ කුමන්ත්‍රණය පැහැදිලිය.

දැන් ගැටුම දේශපාලකයා හා මහජනතාව අතර නොව සාමාන්‍ය ජනයා හා රාජ්‍ය සේවකයා අතරය.

මෙය තව ටිකක් අයිසිං කොට රසවත් කරන්නට පොලීසියේ මරි මෝඩ කම් ද දේශපාලකයින් අපූරුවට යොදා ගනිමින් සිටී.

එතනින් එහාට ගොස් ඔවුහු අත්‍යාවශ්‍ය සේවා කියා වෙනම පෝළිමක රාජ්‍ය සේවකයින් ගොනු කළෝය. එයින්ද නොනැවතී අත්‍යාවශ්‍ය සේවා  වලට දින 7 ම තෙල් සපයන්නට විශේෂිත ස්ථානද නම් කළෝය. මේ කිසි විටෙක මූලික ප්‍රශ්නය වන තෙල් හිඟයට විසඳුම් ලබා නොදීමටද ඔවුන් පරෙස්සම් විය.

කොටින්ම තෙල් සැපයීම තවත් අඩපණ කළෝය.

දැන් බිමේ ගැටුම සුපිරිය. අත්‍යාවශ්‍ය  උන් අනිත් උන් අනවශ්‍ය යැයි කියමින් මරා ගනිති. අපිත් අත්‍යාවශ්‍ය  කරන්න යැයි තව ටිකක් වුන් පිස්සු කෙළිති. ත්‍රී වීල් කරුවන් ඉන්ධන මාෆියා කරුවන් බව ඔප්පු කොට ඔවුන් වෙත සමස්ථ විරෝධයක් ඇති කරමින් සිටිති. සුළු පිරිසක් බඩ වඩා ගැනීම වෙනුවෙන් එවන් කාර්‍ය කරමින්ද සිටී.

කොටින්ම දැන් අර ප්‍රභූ පන්තියට පැමිණි තර්ජනය අපූරුවට උන් විසින් එකතු වී ජනතාව අතර පන්ති අරගලයක් නිර්මාණය වන තැනට සියළු යටිතල පහසුකම් නිර්මාණය කොට අවසන්‍ ය.

දැන් අවශ්‍ය ගිනි කූරක් ගැසීම පමණකි.

රජයේ සේවකයා ත්‍රීවීල් කාරයාට ගසන්නට දැන් මනස සූදානම් ය. සාමාන්‍ය ජනයා රාජ්‍ය සේවකයාට ගසන්නට දැන් මනස සූදානම් කොට ගෙන ඇත.

කොටින්ම දැන් කළු ජූලිය සූදානම් ය. අඩුවකට ඇත්තේ ජූලි මාසය උදා වීම පමණි.

මෙවර මේ අර්බුදය පුපුරවන්නේ සැලසුම් සහගතවය. ගමේ නැති බැරි මිනිහා යමක් කමක් ඇති මිනිහාගේ ගේ ගිනි තියනා තත්වයට දැන් වෛරය සමාජයේ වපුරා අවසන්‍ ය. වාහනයක් නැති කෙනා වාහනයක් ඇති එකාගේ වාහනය කුඩු පට්ටම් කරන්නට යොමු වන තරමට දැන් ආවේගය දරුණුය. කොටින්ම පොලීසියේ එකාගේ දරු පවුලට පොළු මුගුරු එසවෙන මානසිකත්වය අර ප්‍රභූ පැළැන්තිය විසින් ඔවුන්ගේ ගැලවීමට අප තුල පැලපදියම් කොට අවසන්‍ ය.

මේ පිපිරීම සිදු නොවීමට වග බලා ගැනීම ඔබේත් මගේත් වගකීමකි. කොටින්ම අර්බුදයේ දෙවන පිපිරීම පන්ති අරගලයක් ලෙසට නිර්මාණය කොට අවසන්‍ ය.

පැල්පත් වාසීන්ගේ කඩු පොළු වලින් රජයේ සේවකයන් පහර කෑමට නියමිතය. කාර් වෑන් හිමි ජනතාව ත්‍රී රෝද රථ හිමියන් හා අවි අමෝරා ගැනීමට නියමිතය.

වගකිවයුත්තන් එම අර්බුද වෙනුවෙන් අවශ්‍ය සියළු උසිගැන්වීම් කරනවා හැරෙන්නට  මෙම ගිනි නිවීමට අවශ්‍ය හිඟය අවම කිරීමට අවශ්‍ය කිසිදු පියවරක් ගන්නා බවක් පෙනෙන්නට නැත.

උනුත් අසාධාරණ යැයි නොකියමි. උන්ගේ ගෙවල් ගිනිබත් වීම උන්ගේ උන් මියයාම පිළිබඳ සාමාන්‍ය සමාජයෙන් උන්ට ගත යුතු පළියක් උන්ගේ සිත් යට කැකෑරෙමින් ඇත.

උනුන්ගේ පැළැන්තිය උන් රැකගනිමින් ඇත.

අර්බුදයේ දෙවන පිපිරීමෙන් උන් උපක්‍රමශීලීව සැලසුම් සහගතව ආරක්ෂා වී ඇත.

බුද්ධිමත් බව ආවේගයට උඩින් තබා නොගන්නා ඕනෑම මිලි තත්පරයක අපි උන්ගේ පළි ගැනීමට භාජනය වීමේ ප්‍රතිඵලයක් ලෙස පන්තිවශයෙන් බෙදී අපි අපි මරාගෙන  උන් වෙනුවෙන් මුදලින් ගෙවූ වන්දියට අමතර වන්දියක්ද ගෙවනු ඇත.

අර්බුදයේ දෙවන පිපිරීම සැලසුම් කොට අවසන් ව ඇත. එය පන්ති සටනකි.වලක්වා ගැනීම ඔබ හා මා සතු අභියෝගයකි.