දේශීය මෙන්ම විදේශීය වශයෙන් අප වාර්තා කර තිබෙන වාර්තා වෙනුවෙන් යුක්තිය ඉටු වූවත් රත්නපුර දිස්ත්‍රික්කය තුළ සහ සබරගමු පළාත තුළ මහජනතාවට, හෝ පීඩිත පංතිය වෙනුවෙන් රාජ්‍ය සේවයෙන් යුක්තිය ඉටු වී ඇත්තේ ඉතාම අල්ප ලෙසය. ඉන් කියැවෙන්නේ සහ අප ලබාගෙන තිබෙන තොරතුරුවලට අනුව රත්නපුර දිස්ත්‍රික්කය යනු දේශපාලනික වශයෙන් අන්ත දූෂිත දිස්ත්‍රික්කයකි. එසේම රාජ්‍ය ආයතනවල සිටින්නේ අහවල් අහවල් දේශපාලන නායකයින්ගේ ගෝලයන් ය. එම ගෝලයන් කෙසේ සිටියත් රාජ්‍ය සේවයේ පහළ නිලධාරීන් මේ වන විට එම දේශපාලන නායකයන්ට ගරහන තත්ත්වයක් ද දක්නට ලැබේ. නමුත් විධායක පංතියේ විදුහල්පතිවරු ඇතුළු , තීරක පංතියේ අති බහුතරයක් තවමත් ඔවුන්ට සැප දුන් නායකයන් වෙනුවෙන් පෙනී සිටී. එය පුළුල් ආත්මාර්ථකාමී පටු අරමුණු ඔස්සේ ක්‍රියාත්මක වන රාජ්‍ය විරෝධී කුමන්ත්‍රණවල කොටසකි. එය තවමත් නැවතී නැති බව පැහැදිලිවම සාක්ෂි සහිතවම ඔප්පු කිරීමට අප ආයතනය තුල ඕනෑවටත් වඩා සාක්ෂි තිබේ.
මේ සියල්ලම සිදුවන සබරගමුව පළාත් ලේකම්වරයා ප්‍රබල පොහොට්ටු ආධාරකරුවෙකි. අප මීට පෙර ද එය වාර්තා කළේය . ගෝඨාභය රජය පත්කර ගැනීම වෙනුවෙන් සබරගමුවේ පුංචි එවුන්ට සහ දෙමාපියන්ට දැඩි සේ වද දුන් ඔහුට එරෙහිව ගොඩකවෙල පොලිස් ස්ථානය තුළ ද නොවිසුදුණු පැමිණිල්ලක් තිබේ. සැබෑ ලෙසම සබරගමුව අධ්‍යාපනය දූෂණය කළ ඔහු ගෝඨාභය පත් වී මාස කිහිපයක් ඇතුළත කෑගල්ල දිසා ලේකම්වරයා බවට පත් විය . එයට මූලික වූයේ ද රත්නපුරයේ දේශපාලන නායකයෙක් සහ හිටපු ආණ්ඩුකාරවරයෙකි. පැවති යහපාලන රජය මහජනතාවට එපා කරවීම සඳහා ඔහුද හොඳටම කළේය. ඔහු තවමත් එය කරන්නේය. ඒ වෙනුවෙන් ඔහුට දිස්ත්‍රික් ලේකම්කමකුත් ඉන් පසුව පළාත් ලේකම්කමද ලැබුනේය. මහජනතාව පීඩාවට පත්කරමින්, තම තනතුරේ බලය දේශපාලනය වෙනුවෙන් යොදවා තනතුරු ගැනීමට තරම් ඔවුන්ගේ ක්‍රියාකලාපයන්ම පහත් සහ නින්දීත විම රටේම මහජනතාවගේම වරදකි. දේශපාලන නායකයන්ට ගරහන රටේ මහජනතාවට තවමත් තේරුම් නොගිය කරුණ නම් දුෂිත නිලධාරීන්ගේ ක්‍රියාකලාපයයි. මහජනතාව එකතු විය යුත්තේ ඔවුන්ට එරෙහිව බව තවමත් ජනගත වී නැති වීම ඔවුන්ගේ වාසනාවකි.
සබරගමුවේ අතීත සහ වර්තමාන තත්ත්වය එසේ සිදු වෙමින් තිබියදී ඇඹිලිපිටිය මහා විද්‍යාලයේ විදුහල්පතිට , ඇඹිලිපිටිය කලාප අධ්‍යාපන අධ්‍යක්ෂකවරයාට එරෙහිව පැමිණිලි විශාල ප්‍රමාණයක් සබරගමුව පළාත් අධ්‍යාපන ලේකම්වරුන් වෙත ලබා දී තිබේ.ඒ මීට සති , මාස , අවුරුදු ගණනාවක සිටය. නමුත් එම කිසිදු පැමිණිල්ලක් පළාත් අධ්‍යාපන අමාත්‍යාංශය තුළ නොමැති බව අනාවරණය වන්නේ 2023. 08. 17 ය. එවිට නව ලේකම්වරයෙක් පත්ව සිටියේය. නමුත් ඔහුද ඇඹිලිපිටිය මහා විද්‍යාලයේ විදුහල්පති සමඟ සමීප ඇසුරක් ඇති අයෙකු බව මෙන්ම ඔහු සමඟ එක්ව එකී නොකී බොහෝ දේ සාක්ෂි සහිතව අප වෙත ලැබී තිබේ. ඉන් කොටසක් අප මීට පෙර ලිපියකින් පල කර තිබේ. කෙසේ නමුත් පැමිණිල්ලක් ලැබුණු විට එය විභාග කිරීමට අවශ්‍ය නීතිමය රාමුව ක්‍රියාත්මක කිරීමට නොහැකි නම් ඔවුන් රාජ්‍ය සේවයට නොහොත් මහජන සේවයට සුදුස්සෝ නොවේ.
2023.08.17 දින සබරගමුව නව ආණ්ඩුකාර නවීන් දිසානායක මහතා පළාත් අධ්‍යාපන බලධාරීන්ට නියෝග කර තිබුණේ සතියක් ඇතුළත විදුහල්පතිවරයා පිළිබඳව වාර්තාවක් ලබා දෙන ලෙසත් , එම සතිය ඇතුළත ඔහුගේ වැඩ තහනම් කරන ලෙස හෝ ස්ථාන මාරු කර හරින ලෙසත් ය. නමුත් පළාත් අධ්‍යාපන ලේකම්ට එය කර ගැනීමට කොන්දක් නැති බව හෝ ආණ්ඩුකාරවරයාගේ නියෝගය යට ගැසීමට ඔහු කටයුතු කර තිබෙන බව පෙනෙන්නේ සතියක් නොව සති තුනක් ගත වීත් විදුහල්පතිවරයාට එරෙහිව කිසිදු ක්‍රියාමාර්ගයක් ගෙන නොමැති බැවිනි. ඒ අනුව ආණ්ඩුකාරවරයාගේ නියෝගය ක්‍රියාත්මක කිරීමට වඩා විදුහල්පතිට බිය බව ඉන් පැහැදිලි වේ. එයින් කියවෙන්නේ මෙම විදුහල්පති සමඟ දුෂිත ක්‍රියාවන් වල මෙම ලේකම්වරයාද නිරතව සිටි බවයි.
ආණ්ඩුකාරවරයාගේ නියෝගය ක්‍රියාත්මක කිරීමට කොන්දක් ලේකම්වරයාට නොමැති නමුත් විදුහල්පතිවරයා අලුතින් පොත් පත් සකසමින් ඔහුට එරෙහිව එන පරීක්ෂණයකට මුහුණ දිය හැකි ලෙස කටයුතු කරන බව විද්‍යාලයේ සිටින ගුරුවරු ගණනාවක් අප වෙත දන්වා ඇත. ඔහු සමඟ ඔහුගෙන් කොන්ත්‍රාත් ගෙන විවිධ දුෂණවල නිරත වූ බව කියවෙන කිහිපදෙනෙකුද සිටින බවට ඡායාරෑප සහ වීඩියෝ අප වෙත ලැබී තිබේ. ඒ අනුව පළාත් අධ්‍යාපන බලධාරීන් ද මෙම විදුහල්පතිවරයා සමඟ දැඩි දූෂිත ගනුදෙනුවක යෙදී සිටින බව නැවත පැහැදිලි වන අතර අප මීට පෙරම එය වාර්තා කර තිබේ. ඒ අනුව පෙනී යන්නේ ඔහුට එරෙහිව යම් පරීක්ෂණයක් සිදුවන්නේ නම් ඉන් පළාත් ලේකම්වරයා සහ අධ්‍යාපන ලේකම්වරයා පමණක් ස්වයං වින්දනයක් ලබමින් විදුහල්පතිට සුජාතභාවය සහිත නව උප්පැන්නයක් ලබා දීමට සියල්ලම සැකසී තිබෙන බවයි.
ඒ අතර ඇඹිලිපිටිය කලාප අධ්‍යාපන අධ්‍යක්ෂකවරයාට එරෙහිව පරීක්ෂණයක් ආරම්භ කරමින් ඔහුව මාරු කර හැරීමට පසුගියදා රැස්වූ රත්නපුර දිස්ත්‍රික් සම්බන්ධීකරණ කමිටුව තීරණය කරන ලදී. කලාප අධ්‍යාපන අධ්‍යක්ෂකවරයාට එරෙහිව සබරගමුව පළාත් බලධාරීන් සිදු කරන්නා වූ පරීක්ෂණයකින් මහජන යුක්තිය ඉටු වනු ඇති බවට බලාපොරොත්තු තබාගෙන සිටින්නේ නම්, අදාළ පැමිණිල්ල කළ ගුරුවරුන්ට සහ දෙමාපියන්ට එය තාවකාලිකව ලබන්නා වූ ස්වයං වින්දනයක් පමණක් වනු ඇත. එසේ වුවත් කලාප අධ්‍යාපන අධ්‍යක්ෂකවරයා තවමත් එම තනතුරේ රැඳී සිටින්නේ කාර්යාලය තුළ සිටින සේවකයන්ටද බැන වදිමින් බවට අපට තොරතුරු ලැබී තිබේ. පළාත් ලේකම්වරයාද ඔහුට එරෙහිව කිසිවක් නොකරන බව මෙන්ම සිදුකරනු ලබන පරික්ෂණයන් වෙනුවෙන් පත්කරන්නේද ඔවුන්ගේම චක් ගෝලයන් බව අමුතුවෙන් කිව යුතු නොවේ. ඇඹිලිපිටිය පාසල් වෙත යම් දේශනයක් සඳහා පැමිණි පළාතේ තවත් අධ්‍යකෂවරයෙකුට ද ප්‍රසිද්ධියේම මුදල් ලබා දී තිබුනේ මීට මාසයකට පමණ පෙරය. ඒ ඇඹිලිපිටිය මහා විද්‍යාලයේ විදුහල්පති විසිනි.
පසුගිය මාස තුනක් ඇතුළත සබරගමුවේ පාසල් තුනක විවිධ දූෂිත වාර්තා අප ඉදිරිපත් කළේ සාක්ෂි සහිතවය. අධ්‍යාපන බලධාරීන්ගේ දූෂණයන් නිසා පීඩිත මහජනතාව සහ දරුවන්ගේ ජීවිත බේරා ගැනීමට මාධ්‍යවේදීන්ට සිදු වීම කනගාටුවට කරුණක් ලෙස දූෂිත ප්‍රජාවන් නොදනී. එය ඔවුන්ගේ ජයග්‍රහණයකි. හටංගල විද්‍යාලය , අම්බැවිල ප්‍රාථමික විද්‍යාලය , මෙන්ම ඇඹිලිපිටිය මහා විද්‍යාලය මෙම පාසල් තුනයි. බලධාරීන්ගේ නිහඬතාවය සහ ඔවුනොවුන් අතර තිබෙන දූෂිත මාෆියාවේ ප්‍රතිඵලයක් ලෙස පීඩිත පංතියට නිවටයන් සේ සිටීමට සිදුව තිබේ. නමුත් මහජනතාව ඉදිරියේ ඔවුන්ගේ කළු කෝට් ගැලවී තිබේ. විලි ලැජ්ජාවක් නැතිකමේ මහත කෙතරම්ද යත් තමන්ට වැටුප් ගෙවනුයේ මහජනතාව බවත්, කුමන තරාතිරමක වුවත් පවතින නීතියට අනුව තමන් කටයුතු කිරීමෙන් තමන් මහජනතාවගේ බදු මුදලට ණය නොමැති නිලධාරියෙක් බවවත් නොතේරේ. එසේම තමන්ගේ හිතවතුන් බේරාගැනීම වෙනුවෙන් නීතිපොතට පයින් ගසන මෙවන් රාජ්‍ය නිලධාරීන් රට තුළ සිටිනා තාක් කල් රටට යහපතක් සිදු නොවේ. මෙවැනි නිලධාරීන්ට එරෙහිව නඩු පැවරිය හැකි වෙනමම නීති ආයතනයක් ස්ථාපනය කළ යුතු කාලය පැමිණ තිබේ.
ඇඹිලිපිටිය මහා විද්‍යාලයේ විදුහල්පතිවරයාට එරෙහිව කටයුතු කිරීමට අවශ්‍ය නීතිය ක්‍රියාත්මක කිරීමට කොන්දක් නැති දූෂිත අධ්‍යාපන පරිපාලනය හෝ පරිපාලන නිලධාරීන් සබරගමුවේ දරුවන්ගේ අනාගතයට සාපයක් බව පවසන්නේ ප්‍රදේශයේ මහජනතාවය. ඔවුන්ගේ ක්‍රියාකලාපයන් සිදුවන්නේ දූෂණය මත පදනම්වය. මෙම දුෂිත නිලධාරීන් ඔවුන්ගේ බේරීම වෙනුවෙන් මහජනතාව අතර ගැටුම් ඇතිකරවයි. එහිදී ප්‍රබලව නැගී සිටින්නේ දුෂිතයන් වේ. ඔවුන්ට බියවන අහිංසක මිනිසුන්ටද තම මුනිවත රකිමින් දුෂිතයන් සමඟ සිටගැනීමට සිදුව තිබේ. එවන් දූෂිත පරිපාලන නිලධාරීන් සමඟ එක්සත් ජාතික පක්ෂයට සබරගමුව තුළ රත්නපුරය තුළ මන්ත්‍රීවරුන් දිනවීම සිහිනයක්ම වනු ඇත. ඔවුන් එදත් අදත් සිදු කළේ මහජනතාව අතර ගැටුම් ඇති කරවීමයි. ඔවුන්ට පක්ෂපාතී දූෂිත පංතියේ ඉතා කුඩා පිරිස් දූෂිත ප්‍රජාව දූෂිත නොමැති ප්‍රජාව පීඩාවට ලක් කරමින් විවිධ උපක්‍රම භාවිත කරමින් පවතින රජයක් සහ දේශපාලන නායකයන් එපා කරවීම සිදු කරති. අප වාර්තා කළ පාසල් තුනේම තත්ත්වය එසේමය. අපට තොරතුරු නොලැබෙන පාසල් ද ඕනෑතරම් තිබේ.
එවන් වටපිටාවක් සහිත රට තුළ පහළ සිටින නිලධාරීන්ට එරෙහිව කටයුතු නොකරන නිලධාරීන් විනාශ කරනුයේ මහජන මුදල් ය. ඔවුන් රටට සහ රටේ පැවැත්මට හානි කරන්නෝය. එබැවින් ඔවුන්ට එරෙහිව ද කටයුතු කිරීම සඳහා ශ්‍රී ලංකා පාර්ලිමේන්තුව තුළ ක්‍රියාත්මක වන ස්ථීර පරීක්ෂණ කමිටුවක් පත් කිරීමට කාලය පැමිණ තිබේ. එසේ නොමැති නම් නීතීඥ සහය නොලබා තම දුක ප්‍රකාශ කළ හැකි විශේෂ මානුෂවාදී අධීක්ෂණයක් පිහිටුවිය යුතුය. එවිට මෙවැනි දූෂිත නිලධාරීන්ට අවශ්‍ය දඬුවම් ලැබෙනු ඇත. දේශපාලනය තමන්ට පුද්ගලිකව තිබෙන අයිතිවාසිකමක් විනා තම තනතුර ඒ වෙනුවනේ භාවිතා කිරීමට කිසිම රාජ්‍ය නිලධාරියෙකුට අයිතියක් නොමැත.
පෙර වාර්තා