වැලිගම නව ගාලු පාරේ පැලෑන වටරවුම අසල පිහිටි ප්‍රකට සංචාරක හෝටලයක් වූ W15 හෝටලයට අද අළුයම වෙඩි තබා පලා යෑමට තැත් කිරිමේ දී වැලිගම පොලිස් නිලධාරීන්ගේ වෙඩි ප්‍රහාරයට ලක් වූ කොළඹ අපරාධ කොට්ඨාසයේ පොලිස් නිලධාරියෙක් මිය ගොස් තවත් නිලධාරියෙක් තුවාල ලබා තිබේ.
වාර්තාවන පරිදි සිද්ධිය මෙසේය.
අද අළුයම කේ.ඩී.එච්. වෑන් රථයකින් පැමිණි පිරිසක් වැලිගම නව ගාලු පාරේ පෑලෑන වටරවුම අසල පිහිටි W15 හෝටලය තුළට ගොස් වෙඩි ප්‍රහාර කීපයක් එල්ල කර තිබේ.
එම අවස්ථාවේ දී ඊට නුදුරින් මේ දිනවල ක්‍රියාත්මකවන මත්ද්‍රව්‍ය මෙහෙයුම්වල යෙදෙමින් සිටි වැලිගම පොලිසියේ ජංගම පොලිස් සංචාරක රථයක් අසල තිබී ඇත. එම ඒකාබද්ධ මෙහෙයුම සඳහා යෙදවූ හමුදාවේ නිලධාරීන් පිරිසක් ද එම රථයෙහි හිඳ තිබේ.
සිද්ධිය වර්තා වීමත් සමග වෙඩි ප්‍රහාර එල්ල කළ කේ.ඩී.එච් රථය හඹා ගිය පොලිස් ජංගම රථය මාර්ගය හරස් කර පලා යන වෑන් රිය නවත්වාගෙන ඇත.
එහෙත් ජංගම රථයට වෙට්ටුවක් දමා වෑන් රථය පළා ගොස් තිබේ. ඒ අවස්ථාවේ දී ජංගම පොලිස් රථය වෑන් රිය හඹා ගොස් වෙඩි තබා ඇත. අනතුරුව වැලිගම පොලිසිය විසින් මෙම පලා යන රථය සම්බන්ධව සියලුම තොරතුරු පොලිස් ස්ථාන ඇතුළු ආරක්ෂක අංශ වෙත දැනුම් දී ඇත.
ඒ අනුව පලා ගිය රථය ඉමදූව පිවිසුමෙන් අධිවේගී මාර්ගයට ඇතුළු කිරීමට උත්සාහ කිරීමේ දී අධිවේගී මාර්ග ආරක්ෂක පොලිසිය විසින් නවත්වා පරීක්ෂා කිරීමට උත්සාහ කිරීමේ දී රථයේ සිටින කණ්ඩායම තමන් කොළඹ අපරාධ කොට්ඨාසයේ බව දන්වා හැඳුනුම්පත් ඉදිරිපත් කළත් එතැනින් ප්‍රවේශවීමට පොලිසිය ඉඩ දී නැත. ඒ අතර උසස් පොලිස් නිලධාරියෙකුගෙන් එන නියෝගයක් පරිදි මෙම පිරිස මුදා හැරීමට අධිවේගී මාර්ගයේ පොලිස් නිලධාරීන්ට සිදුවී ඇතැයි වාර්තා වේ.
මේ අතර වෙඩි වැදුන පුද්ගලයා අධික රුධිර වහනය නිසා මියගොස් ඇති බවත් තවත් පුද්ගලයෙක් තුවාල ලබා ඇති බවත් වාර්තා වූයේය. පසුව විමසීමේ දී මෙම කේ.ඩී.එච්. වෑන් රථයේ පැමිණ W15 හෝටලට වෙඩි තබා ඇත්තේ කොළඹ අපරාධ කොට්ඨාසයේ නිලධාරීන් පිරිසක් බව හෙළි වී ඇත. මිය ගොස් අත්තේ කොළඹ අපරාධ කොට්ඨාසයේ පොලිස් සැරයන්වරයෙකි. වෙඩි වැදි බරතපතල තුවාල ලබා ඇත්තේත් කොළඹ අපරාධ කොට්ඨාසයේ උප පොලිස් පරීක්ෂකවරයෙකි. ඔවුන් කරාපිටිය ශික්ෂණ රෝහලට ඇතුළත් කර තිබුණු බව දකුණු පළාත් භාර ජ්‍යෙෂ්ඨ නියෝජ්‍ය පොලිස්පති කාර්යාලය පවසයි.
දිවයිනේ පළාත් කීපයක පවතින W15 හෝටල් ඒ.ජේ.එම් මුසම්මිල් ගේ පුත්‍රයාට හිමි බව වාර්තා වේ.
සිදුවූයේ කුමක්දැයි මේ වනවිට පොලිසිය ද වික්ෂිප්තව සිටින අතර තොරතුරු පිටතට යෑම වළක්වා ගැනීම සඳහා විශේෂ උත්සාහයක් දරමින් ඇති බව පොලිසියේ අභ්‍යන්තර ආරංචි මාර්ග කියයි.
පොලිසිය වැඩිදුර විමර්ශන පවත්වයි.
(lankasara)
