මිනිස් ජාවාරම්වලට සම්බන්ධ පුද්ගලයින් සොයා දීප ව්‍යාප්ත වශයෙන් වැටලීම් සිදු කිරීමටත්, මිනිස් ජාවාරම් සහ මිනිස් වෙළදාමට සම්බන්ධ පුද්ගලයින්ට තරාතිරම නොබලා දඩුවම් කිරීමටත්, කම්කරු සහ විදේශ රැකියා අමාත්‍ය මනුෂ නානායක්කාර මහතා සහ මහජන ආරක්ෂක අමාත්‍ය ටිරාන් අලස් මහතා, පොලිස් දෙපාර්තමේන්තුවේ, ශ්‍රී ලංකා විදේශ සේවා නියුක්ති කාර්යාංශයේ, ආගමන විගමන දෙපාර්තමේන්තුවේ ඉහළ නිලධාරීන් සමග අද (16) පැවති විශේෂ සාකච්ඡාවකදී තීරණය කර ඇත.
මිනිස් ජාවාරම්වලට සම්බන්ධ පුද්ගලයින්ට එරෙහිව ගන්නා පියවරයන්හි ප්‍රගතිය සම්බන්ධයෙන් සෑම සති දෙකකට වරක්ම නිලධාරි මට්ටමේ ප්‍රගති සමාලෝචනයක් පැවැත්වීමටත් මෙහිදී තීරණය කර තිබේ. දේශීය හා විදේශීය වශයෙන් මිනිස් ජාවාරම්වලට සම්බන්ධ ශ්‍රී ලාංකිකයින් සම්බන්ධයෙන් ශ්‍රී ලංකා විදේශ සේවා නියුක්ති කාර්යාංශයට මේ වන විට ලැබී ඇති තොරතුරු මත වැටලීම් අඛණ්ඩව සිදු කරමින් පවතින අතර මේ අනුව එම වැටලීම් වඩාත් වේගවත් කිරීමටද නියමිතව ඇත.
මේ අතර මිනිස් ජාවාරම් සහ මිනිස් වෙළදාම සම්බන්ධයෙන් ජනතාව දැනුවත් කිරීමේ වැඩසටහනක් ක්‍රියාත්මක කිරීමටද මෙහිදි වැඩිදුරටත් තීරණය කර තිබේ.
මෙම සාකච්ඡාව සදහා පොලිස්පති සී.ඩී. වික්‍රමරත්න මහතා ඇතුළු ඉහළ පොලිස් නිලධාරීන්, ආගමන විගමන දෙපාර්තමේන්තුවේ ඉහළ නිලධාරීන් සහ ශ්‍රී ලංකා විදේශ සේවා නියුක්ති කාර්යාංශයේ ඉහළ නිලධාරීන් එක්ව සිටියේය.
ශ්‍රී රාවණා සටහන.
ශ්‍රී ලංකාව මේ වන විට සෑම අතකින්ම දූෂණය වී අවසන්ය . දීර්ඝ කාලයක් තිස්සේ නීතියට එරෙහිව කටයුතු කිරීම සිදුවන්නේද සමහර දේශපාලඥයන්ගේ සහ සමහර රාජ්‍ය නිලධාරීන්ගේ ද එකමුතුව ඇතිවය. දීර්ඝ කාලයක් තිස්සේ අයාලේ ගිය රටක එක කොටසක් පමනක් නිවැරදි කිරීම ලෙහෙසි පහසු කටයුත්තක් නොවේ.නමුත් කොටසින් කොටස හෝ නිවැරදි කරන්නේ නම් එය අගය කල යුතුය.
එසේම ඉහත සදහන් සාකච්ඡාවට අනුව කියවෙන ඡාවාරම්කරුවන්ට විරුද්ධව පොලිසිවලට පැමිණිලි විශාල වශයෙන් ඉදිරිපත්ව තිබේ. ඒවා බොහොමයක් ඉදිරිපත්ව තිබෙන්නේ විදේශ රැකියාවල් ලබාදෙන පොරොන්දුව මත මුදල් වංචා කිරීම් පිලිබදවය. එසේම සංචාරක වීසා මත විදේශගතව රැකියා ලබාගැනීමට නොහැකිවීම් පිලිබදවය. කෙසේ නමුත් මුදල් වංචා කිරීම් සිදුකල වංචනික පුද්ගලයන්ටවත් නිසි ලෙස නීතිය ක්‍රියාත්මක කිරීමට බොහෝ පොලිස් නිලධාරීන් අසමත්ව තිබේ. පහත සදහන් වන්නේ එසේ මුදල් ලබාගෙන විදේශ රැකියා හෝ මුදල් ලබා නොදුන් අප වාර්ථා කරන ලද සිද්ධියකි.
එම සිද්ධියට සම්බන්ධ පුද්ගලයාට එරෙහිව පැමිණිලි ගණනාවක් විවිධ පොලිසිවලට යොමුව තිබේ. ඒ අනුව පෙනීයන්නේ එවැනි ක්‍රියාවන් නැවැත්වීම සදහා අවශ්‍ය නීති සකස්ව නැති බවයි. විදේශ රැකියා ලබාදෙන බව පවසමින් යම් පුද්ගලයෙක් මුදල් ලබාගතහොත් එයද මිනිස් ජාවාරම්වලට ඇතුලත්වන ලෙස සහ තවත් අඩුපාඩු සොයා නීතින් ඇතුලත්කල යුතුය. එසේ නොමැතිව වැටලීම් කිරීම ඵල රහිතය. ඒවා පොලිසිය තුලදීම විසදාගැනීමට ඔවුන් මුදල් විසි කරති. නමුත් ඒ අයුරින් මුදල් ලබාගෙන විදේශ රැකියාවලට ගිය ශ්‍රී ලාංකිකයන් දහස් ගණනක් සිටී. උදාහරණයක් ලෙස විදේශ රැකියා නියෝජිත ආයතනයක් ලක්ෂ 10 ක් ඉල්ලන විට එම රටේ එම රැකියාවටම ලක්ෂ තුන හතර ලබා දී ගිය අයද දහස් ගණනක් සිටී. වාර්ථාවන ආකාරයට ජපානය තුල පමණක් එවැනි ලාංකිකයින් 3000 කට වඩා සිටින අතර ඔවුන්ද ලංකාවට එවන්නේ ඩොලර්ය.