.
ශ්‍රී ලංකා ගුවන් හමුදාවට අයත් මිග් යානා ගනුදෙනුවේ වංචාව ඩොලර් මිලියන 15 ක් බවත්, එම කූප්‍රකට ගනුදෙනුවට අදාලව අපරාධ පරීක්ෂණ දෙපාර්තම්න්තුවේ සිදුවන පරික්ෂණයන් මන්දගාමී බවත්, වාර්තා වන්නේ ශ්‍රී ලංකා ගුවන් හමුදාව අපරාධ පරීක්ෂණ දෙපාර්තෙම්න්තුවට එම පැමිණිල්ල ඉදිරිපත් කිරීමටත් පෙර ගුවන් හමුදාධිපති රොෂාන් ගුණතිලක සමයේමය.
ගුවන් හමුදාධිපති රොෂාන් ගුණතිලකගේ නියමයෙන්, ඔහුගේ ආරක්ෂක නිළධාරියෙකු එම ලිපි ගොනුව රැගෙන විත් බාර දි තිබෙන්නේ ඔහුගේ ප්‍රධාන සහකාර නිලධාරියට බවට එම කාලයේදී ගුවන් හමුදාව තුල ප්‍රචලිතව තිබුනේය. ගුවන් හමුදාව තුල තිබු එම ලිපිගොනුව, ඔහුගෙන් පසුව එන ගුවන් හමුදාධිපතිට බාර දිය යුතුය. ඒ එම ලිපිගොනුව රාජ්‍යයන් දෙකක් අතර සිදු වූ ගනුදෙනුවක් බැවිනි.
එසේම ගුවන් හමුදාධිපති රොෂාන් ගුණතිලකගේ උපදෙස් මත රවී ජයසිංහ නම් වූ එම නිලධාරියා විසින් එම ලිපිගොනුව විනාශකල බවටද එකල කතාබහක් පැතිර ගියේය.
දැන් අපරාධ පරීක්ෂණ දෙපාර්තමේන්තුව කල යුත්තේ, මෙම ලිපි ගොනුව පිළිබඳව එකල කටයුතු කල සියලුම නිලධාරීන් ගෙන්වා ප්‍රශ්න කිරීමය. ඒ අයුරින් විධිමත්, පුළුල් විමර්ශනයක් කළහොත්, ඒ පිළිබඳව සියලු තොරතුරු සොයාගත හැකිවනු ඇත. එසේම හිටපු ගුවන් හමුදාධිපති රොෂාන් ගුණතිලක, ඔහුගේ ආරක්ෂක නිලධාරින්, ඔහුගේ අධි සහායක නිලධාරින් ගෙන්වා, දිගින් දිගටම, රදවාගෙන ප්‍රශ්න කිරීමටද අපරාධ පරීක්ෂණ දෙපාර්තමෙන්තුවට බලය තිබේ. විය යුත්තේද එයමය. ලිපි ගොනුවේ වගකීම සම්පුර්නයෙන්ම තිබෙන්නේ එකල සිටි ගුවන් හමුදාපති රොෂාන් ගුණතිලකය.
කෙසේ වුවත්, එම ලිපිගොනුව පිළිබඳව එකල සිටි ගුවන් හමුදාධිපති සම්පුර්ණයෙන්ම වග කිව යුතුය. ලිපි ගොනුව අතුරුදහන් නම් එයටද ඔහු වගකිව යුතුය. එබැවින්, ඔහු සහ ඔහුගේ කාර්ය මණ්ඩලයද, එම ලිපිගොනුවේ ගමන් මාර්ගයද සෙවිය යුතු වුවත්, එම පොත් පත් මේ වන විට විනාශ කර තිබිය හැකිය. හිටපු ගුවන් හමුදාධිපති රොෂාන් ගුණතිලක සමයේම මෙය අතුරුදහන් වුයේ නම්, ඉන් කියවෙන්නේ මෙම කූප්‍රකට ගනුදෙනුවට ඔහුද සම්බන්ධ බවයි.
එම නිසා අපරාධ පරීක්ෂණ දෙපාර්තම්නේතුව දැන් කල යුත්තේ එම කාලයේ ගුවන් හමුදාවේ අදාළ ස්ථානවල සිටි පුද්ගලයන් ගෙන්වා, ඔවුන්ගේ ප්‍රකාශ මත, තොරතුරු සොයා ලිපිගොනුවේ වගකිව යුතු පාර්ශ්වයන් සෙවීමය. එසේ නොමැතිනම් මිග් ගනුදෙනුව සිදු වූ අනෙක් රටෙන් අදාළ සත්‍ය පිටපත රාජ්‍ය තාන්ත්‍රික මට්ටමින් ලබාගැනීමට හැකිද යන්න විමසීමයි. ඒ අනුව මෙම මිග් ගනුදෙනුව නම්, මහා පරිමාන ලෙස රටේ, රටේ මහජන මුදල් වංචා කල හොරු රැලට දඩුවම් ලබා දිය හැකිය.
(2008 වර්ෂයේ ඇමෙරිකාවේ වොෂින්ටන් නුවර පැවති, ගුවන් හමුදා ප්‍රධානින් ගේ ගෝලීය සමුළුවේදී ලබා ගත් ඡායාරුපයකි)
අදාළ සිදුවීම පිළිබදව අද ලංකාදීප පුවත්පතේ වාර්තාව පහත දැක්වේ.
ඩොලර් මිලියන 15ක් සම්බන්ධයෙන් රාජ්‍යයන් දෙකක් අතර අත්සන් කළ මිග් යානා ගනුදෙනුවට අදාළ මුල් ගිවිසුම අස්ථානගත වී ඇතැයි ජනාධිපති නීතිඥ මෛත්‍රී ගුණරත්න කොටුව මහේස්ත්‍රාත් තිලිණ ගමගේට දැනුම් දී ඇත.
එයාර් වයිස් මාර්ෂල් කුමාරසිංහ රහස් පොලිසියට ප්‍රකාශයක් දෙමින්, මිග් යානා ගනුදෙනුවට අදාළ මුල් ගිවිසුම අස්ථානගත වී ඇති බව හෙළිකොට ඇතැයි කී ජනාධිපති නීතිඥ මෛත්‍රී ගුණරත්න, වසර 08ක කාලයක් ගත වී ඇතත් රහස් පොලිසිය ඒ සම්බන්ධයෙන් මෙතෙක් කිසිදු පියවරක් ගෙන නැතැයි ද සඳහන් කර ඇත.
මිග් යානා ගනුදෙනුවට අදාළ මුල් ගිවිසුම අස්ථානගත කළ පුද්ගලයන් සම්බන්ධයෙන් මෙතෙක් කිසිදු පියවරක් නොගත් රහස් පොලිසිය, එම ගනුදෙනුවේ තැරැව්කරුවන් ලෙස පමණක් කටයුතු කළ ටී.එස්. ලී සහ එන්.ජේ. ලේක්හිම් නමැති සිංගප්පූරු ජාතිකයන් දෙදෙනා සැකකරුවන් වශයෙන් නම් කිරීමට කටයුතු කර ඇතැයි ද පෙන්වා දී තිබේ.
නඩුවේ සැකකරුවන් නොවන සිංගප්පූරු ජාතිකයන් දෙදෙනාට නිකුත් කර ඇති නිල නිවේදන ආපසු කැඳවන්නැයි ඉල්ලමින් ජනාධිපති නීතිඥ මෛත්‍රී ගුණරත්න කළ ඉල්ලීම සළකා බැලු මහේස්ත්‍රාත්වරයා, අදාළ සකකරුවන් දෙදෙනා සම්බන්ධයෙන් මේ මස 17 වැනිදා අධිකරණයේ පෙනී සිට කරුණු දැක්වීමට අපරාධ පරීක්ෂණ දෙපාර්තමේන්තුවට නියම කර ඇත.
ශ්‍රී ලංකා ගුවන් හමුදාව සඳහා 2018 වසරේ දෙසැම්බර් මස 12 වැනිදා ඩොලර් මිලයන 15ක් වියදම් කර මිග් යානා මිලදී ගැනීමේදී වංචාවක් වූ බවට සඳහන් කරමින් ඉදිරිපත් වූ පැමිණිල්ලකට අදාළව විමර්ශනය කළ රහස් පොලිසිය සිද්ධිය සම්බන්ධයෙන් අධිකරණයට කරුණු වාර්තා කර තිබිණි.
සිද්ධියේ සැකකරුවන් වශයෙන් සිංගප්පූරු ජාතික ටී. එස්. ලී, එන්.ජේ. ලේක්හිම්, පෙරගොඩව්, මයිකොලා, කුර්දකෙව් සහ ශ්‍රී ලංකා ගුවන් හමුදාවේ ජයනාත් කුමාරසිරි, හිටපු රුසියානු තානාපති උදයංග වීරතුංග නමැත්තත් සහ ඩී. එස්. එලායන්ස් සමාගම සහ බෙලරුසා හෝල්ඩින්ග්ස් සමාගම නම් කර ඇත.
හිටපු රුසියානු තානාපති උදයංග විරතුංග ඇප මත මුදාහැර ඇති අතර, සිංගප්පූරුවේ බෙරිමිසා සමාගමේ අධ්‍යක්ෂවරුන්වන පී. එස්. ලී, ඔහුගේ බිරියවන එන්.ජී. ලේක්හිම් යුවළ අත්අඩංගුවට ගැනීමට නියම කරමින්, ඔවුන්ට එරෙහිව අන්තර්ජාතික වරෙන්තු නිකුත් කර තිබේ.
මෝසමක් මාර්ගයෙන් මෙම පැමිණිල්ල කැඳවනු ලැබූ අවස්ථාවේදී සැකකාර සිංගප්පූරු ජාතිකයන් දෙදෙනා වෙනුවෙන් පෙනීසිටි ජනාධිපති නීතිඥ මෛත්‍රී ගුණරත්න කරුණු දක්වමින්, ප්‍රශ්නගත ගුවන් ගනුදෙනුවේදී තම සේවාදායකයන් දෙදෙනා තැරැව්කරුවන් ලෙස පමණක් කටයුතු කර ඇතැයි පවසා ඇත.
ප්‍රශ්නගත මිග් යානා ගනුදෙනුවට අදාළ ගිවිසුම් අත්සන් කළ හිටපු ගුවන් හමුදාපති, එයාර් මාර්ෂල් රොෂාන් ගුණතිලක මෙහි ප්‍රධාන සැකකරුවකු යැයි කී යැයි ජනාධිපති නීතිඥ මෛත්‍රී ගුණරත්න, ඔහු අත්අඩංගුවට නොයෙන තැරුව්කරුවන් වශයෙන් කටයුතු කළ තම සේවාදායකයන්ට වරෙන්තු නිකුත් කර ඇතැයි පවසා තිබේ.
ප්‍රශ්නගත මිග් යානා ගනුදෙනුවට අදාළ මුල් ගිවිසුම අස්ථානගත වී ඇති බවට එයාර් වයිස් මාර්ෂල් කුමාරසිංහ ප්‍රකාශයක් දෙමින් සඳහන් කර ඇති හෙයින්, ඔහු සම්බන්ධයෙන් ගෙන ඇති පියවර කුමක් ද, රාජ්‍යයන් දෙකක් අතර එළැඹි ගිවිසුමක් අස්ථානගත හැකි ද යනුවෙන් ප්‍රශ්න කළ ජනාධිපති නීතිඥ මෛත්‍රී ගුණරත්න, ඩොලර් මිලියන 15ක් සම්බන්ධයෙන්වන ගනුදෙනුවක මුල් ගිවිසුම අස්ථානගත වීම සම්බන්ධයෙන් රහස් පොලිසිය අද වනතුරු පියවර ගෙන නැතැයි ද, වසර 8ක් තිස්සේ මෙම නඩුව පවත්වාගෙන යන බවද පෙන්වා දී ඇත.
අතරමැදියන් වශයෙන් කටයුතු කළ, සිද්ධියේ කිසිදු වරදක් කර නැති විදේශ ජාතිකයන් දෙදෙනා නඩුවේ සැකකරුවන් නොවන බව බැලූ බැල්මට පෙනී යන බවත්, ඔවුන් නඩුවේ සාක්ෂිකරුවන් විය යුතු බවත්, පෙන්වා දුන් ජනාධිපති නීතිඥ මෛත්‍රී ගුණරත්න, ඔවුන්ට නඩුව සඳහා මෙරටට පැමිණීමට හැකි වාතාවරණයක් සකස් කර දෙන්නැයි ඉල්ලා තිබේ.
කරුණු සලකා බැලීමෙන් අනතුරුව, මේ සම්බන්ධයෙන් කරුණු දක්වන ලෙස අපරාධ පරීක්ෂණ දෙපාර්තමේන්තුවට නියෝග කළ මහේස්ත්‍රාත්වරයා, පැමිණිල්ල ලබන 17 වැනිදා යළි කැඳවීමට නියම කර ඇත.(ලංකාදීප)