ලෝකය පුරාම බන්ධනාගාර ආරක්ෂකයන් සේවයේ යොදවා සිටී. ඔවුන්ගේ ප්‍රධානතම රාජකාරිය වන්නේ රැඳවියන්ගේ සහ සිරකරුවන්ගේ ආරක්ෂාව සහ ඔවුන්ගේ පහසුකම් සහතික කිරීමයි. ඒ සදහා අවශ්‍ය දැනුමින් ඔවුන් සන්නද්ධව සිටිය යුතුය. ඔවුන් සන්නද්ධ විය යුත්තේ සිරකරුවන් පාලනය කිරීමට නොවේ, ඔවුන් පුනරුත්තපනය කිරීමට අවශ්‍ය දැනුමින්, හැකියාවන්ගෙන් සහ ආකල්ප වලිනි (Knowledge, Skills and Attitudes). එය විශාල පරාසයකි.
ලෝකයේ සාර්ථක රටවල් සියල්ලම සාර්ථකව තිබෙන්නේ සුදුසු තැනට සුදුසු දැනුමින් යුත් පුද්ගලයන් පත් කිරීමෙනි. ලෝකයේ සාර්ථකව ගලාගෙන යන බන්ධනාගාර වලද එසේමය. එම බන්ධනාගාරවල් වලින් එලියට එන රැදවියන් නැවත බන්ධනාගාරගත නොවේ. එසේ කිරීමට නම් බන්ධනාගාර නියාමකයින් අප ඉහතින් සදහන් කල දැනුමින් සන්නද්ධ විය යුතුය.
ලෝකයේ බොහෝ රටවල් වල ප්‍රාදේශීය සහ රාජ්‍ය තනතුරු සඳහා අවශ්‍ය වන්නේ උසස් පාසල් ඩිප්ලෝමාවක් හෝ ඊට සමාන දෙයක් පමණි. නමුත් ඒවායේ බන්ධනාගාර කාර්යාංශයන් වලට අනුව බන්ධනාගාර ආරක්ෂකයින් ලෙස වැඩ සාමාන්‍යයෙන් උපාධියක් අවශ්‍ය වේ. බන්ධනාගාර නියාමකයින් සඳහා අදාළ උපාධි අපේක්ෂක අධ්‍යාපනයට අපරාධ යුක්තිය පිළිබඳ උපාධියක් වුවද ඇතුළත්ව තිබිය හැකිය. එසේම සමහර වැඩසටහන් නිවැරදි කිරීම් සඳහා අවශ්‍ය දැනුම් මෙන්ම පුහුණුවක්ද ලබා දෙයි. එසේම උපාධි අවශ්‍යතාව සමඟ බන්ධනාගාර නියාමකයින් අනිවාර්යෙන්ම බන්ධනාගාරයේ සහ වෙනත් ආයතනවල අමතර පුහුණු වැඩසටහන් සම්පූර්ණ කිරීමට අවශ්‍ය වේ. එම පුහුණු වැඩසටහන්වලට ගිනි අවි පුහුණුව, සිරකරුවන්ගේ අයිතිවාසිකම්, බන්ධනාගාර කල්ලි, අර්බුද කළමනාකරණය, මානසික සෞඛ්‍ය ගැටලු සහ නිලධාරීන්ගේ ආරක්ෂාව වැනි පාඨමාලා ඇතුළත් වේ.
අප ඉහතින් සදහන් කල සියල්ලම ශ්‍රී ලංකාවේ බන්ධනාගාරයන් තුල ක්‍රියාත්මක නොවේ. ඒවායේ නිසි විධ්‍යනුකූල්ව සම්මත දේවල් සිදුවන්නේ නම් ශ්‍රී ලංකාවේ අපරාධ වැඩි වන්නේ නැත.
ශ්‍රී ලංකාවේ බන්ධනාගාර නියාමකවරයෙකු වීමට අවශ්‍ය සුදුසුකම් සියල්ලම දෙස බලන විට එහි සුදුසුකම වන්නේ ශ්‍රී ලංකාවේ ආරක්ෂක හමුදාවන් වල සාමාන්‍ය සෙබල තනතුරට අදාළ අධ්‍යාපන සුදුසුකමකි. බන්ධනගාර නියාමකවරයෙකු වීම සදහා සාමාන්‍ය පෙළ 6/4 සමග උස අඩි 5 අඟල් 4 කට වඩා තිබිය යුතුය. ඒ අතරම දේශපාලන සම්බන්ධකම් ද විශේෂ සුදුසුකමකි. ඒ ආකාරයෙන් නියාමක තුට්ටු දෙකට ගියේ නම් ශ්‍රී ලංකාවේ බන්ධනගාරවලින් එලියට පැමිණෙන පුද්ගලයන් දිගින් දිගටම අපරාධකරුවන් වෙමින් සංවිධනාත්මක අපරාධකරුවන් දක්වාම අපරාධ ජීවිත ගතකරන්නන් බවට පත්වීම වැලැක්විය නොහැකිය .
බන්ධනාගාර නියාමකයන් ගේ හිඟය මඟහරවා ගැනීමට නියාමකවරුන් අටසියයක් පමණ බඳවා ගැනීමට පසු ගිය කාලයේ අයදුම්පත් කැඳවා තිබුණේය. එහෙත් එයින් අඩක් ඉවත් කර යුද හමුදාවේ වසර 12 ක සේවා කාලය ඉක්ම වූ පිරිසක් එක් කර ගැනීමට උසස් පුද්ගලයකු ගේ යෝජනාවක් සම්මත විය. එයින්ම පැහැදිලි වන්නේ ශ්‍රී ලංකාවේ බන්ධනගාර නියාමකවරුන්ට අවශ්‍ය යුධ පුහුණුව පමණක් බවයි. එම නියාමකවරුන් බදවාගෙන තිබුනේ බන්ධනාගාර වට ආරක්ෂාව ට බවට අපට තොරතුරු වාර්තා වේ. මෙම යෝජනාව සම්මත කල නිලධරියා එම බඳවාගැනීම් සඳහා අධ්‍යාපන සුදුසුකම් සහ උස ඇතුලත් නො කිරීමට කටයුතු කර තිබේ .
මෙම බඳවා ගත් පිරිස අතර “අම්මා” කියා ලියා ගැනීමටත් නොහැකි කිහිප දෙනෙකුද සිටින බව කියා වේ. අම්මා ලෙස ලියාගැනීමට හැකියාවක් තිබුනත් ඔවුන් සතුව තිබෙන දැනුමට එයින් අභියෝග කරයි. එසේ ම තිබිය යුතු උසද ප්‍රමාණය ද සපුරා නොමැති අයවලුන් ද සිටින බවද කියා වේ. කෙසේ නමුත් ශ්‍රී ලංකාවේ පවතින නීතිය තුල ඕනෑම පුද්ගලයෙකු බඳවා ගැනීමට අවශ්‍ය නීතිමය පසුබිම සකසා ගැනීමට ආයතන ප්‍රධානියාට බලය දී තිබේ. එය ආයතන සංග්‍රහයේ දෙවැනි පරිච්චේදය තුල සඳහන් වේ. නමුත් බන්ධනාගාරයට නියාමකවරුන් මෙන්ම අනෙකුත් පුද්ගලයන්ද බදවා ගත යුත්තේ සිරකරුවන්ට සැලකිය හැකි දැනුමින් සන්නද්ධ වුවන්ය. අදාළ නිලධාරීන් අමතක නොකළ යුත්තේ ඔබගේ ක්‍රියාත්මක වීමේ දුබලතාවය හේතුවෙන් රටක් ගිනිගෙන විනාශ වන බවයි. අපරාධ දිගින් දිගටම වැඩි වීමේ වගකීම ගත යුත්තේ ඔබම බවයි.
මේ සිද්ධියේදී හාස්‍යට එක් කරන තවත් කරනුක ලෙස හමුදාවේ උසස් නිලධාරීන්ගේ පුද්ගලික රාජකාරි වලට ද ඔවුන් උදව් කරමින් කාලය ගත කරන බව වාර්තා වීමයි. එයටද ගැටළුවක් නැත. ඔහුගේ රාජකාරියෙන් බැහැරව ඔහුට එය කල හැකිය. පුද්ගලික මට්ටමෙන් උදව් උපකාර කිරීමේ කිසිම වරදක් නැත. ලංකාවේ ප්‍රසිද්ධ හාල් ව්‍යාපාරිකයකුගේ ආරක්ෂාවට යොදවා සිටි අයෙකු ද මෙම පිරිස අතර සිටින බවද වාර්තා වේ.
එහි වරද ඔවුන්ගේ නොවේ. තනතුරට නිසි වටිනාකමක් ලැබෙන අයුරින් බදවා ගැනීම නොකිරීම, පුහුණුවීම් නොදීම මෙන්ම මෙම සේවා මුක්ත හමුදා භට පිරිස පුහුණුවීම් අවසන් කර විසිර යාමේ උත්සවයක්ද පවත්වා අඩුම තරමින් ඉදිරියේ වැඩකළ යුත්තේ කෙසේද යන්නවත් ඔවුන්ට පවසා නැත. එහිදී විසිරයාම් උත්සවය තෙවරක්ම අවලංගු කර තිබේ. නමුත් ඒ සියලුම ප්‍රමාදයන්වලදී වියදම් වන්නේ ඔවුන්ගේ පුද්ගලික බුදලයක් නම් නොවේ. ඒ ගෙවෙන්නේ මෙරට දුක් විදින ජනතාවගේ බදු මුදල්ය.
මෙම විසිරයාම ප්‍රමාදවීමට හේතුව ලෙස සදහන් වන්නේද මෙම පිරිස රැකියාවට බඳවා ගැනීමේ යෝජනාව සිදු කල උසස් නිලධාරියාට විසිරයාමේ උත්සවයට සහභාගීවීම සඳහා දිනයක් නොතිබූ නිසා බවද කියවේ. මෙසේ දූෂිත වැඩක් කරමින්, මෙතෙක් නියාමකවරුන් බඳවාගත් ක්‍රමයටත් පිටින් ගොස් නුසුදුසු තවත් නිලධාරින් කොටසක් බඳවාගත් මෙම නිලධාරියාගේ ගෝලයෝ බන්ධනගාර නිලධාරීන්ගේ පාලනයෙන් ගිලිහි තිබේ.
එසේම ඔවුන් තවමත් ජීවත් වන්නේ ශ්‍රී ලංකා හමුදා සේවයේය. බන්ධනගාර සේවය යනු කුමක්දැයි බහුතර බන්ධනගාර නිලධාරින්ද නොදන්නා සේම, අලුතින් බදවා ගන්නෝද නොදනී. එයින් කියවෙන්නේ අප ඊයේ වාර්තා කල අකාරයේ ලොව පහත්ම, දූෂිතම බන්ධනගාර තත්වයට ශ්‍රී ලංකාවේ බන්ධනගාර ද පත් වීම ඉක්මනින්ම සිදු වනු ඇති බවයි. අප එවැනි තත්වයන් ගණනාවක්ම දුටුවෙමු . ආසන්නම සිද්ධිය වාර්තා වන්නේ කන්දකාඩුවෙනි. මෙම බදවා ගත් නිලධාරීන් සියල්ලෝම කොළඹට පමණක් සීමා කර තිබේ. දූෂිත රාජ්‍ය සේවයේ දූෂිතයන් පුනරුත්තාපනය කිරීමට තිබෙන බන්ධනාගාර ඊටත් ඒවා තව දුරටත් දුෂණය කරන මෙම දූෂිත බදවාගැනීමට අනුබල දී බලපෑම් කල පුද්ගලයා සොයා ඔහුගේ දේශපාලනික රාජකාරියෙන් ගැලවීමට වෙනමම පුනරුත්ථාපනයක් සිදුකිරීමට සිදුව තිබෙන බවද පැහැදිලිය.
මේ සියල්ලටම පෙර ගෝඨාභයගේ මෙන්ම මහින්දලාගේද බළල් අතක් වූ මේ දූෂිත බදවාගැනීමට බලපෑම් කල පුද්ගලයා සිදුකර තිබෙන අපරාධය සුළු පටු නොවේ.