මහ බැංකුව සහ රජය සතු ව්‍යවසායයන්ගේ මූල්‍ය බලතල කප්පාදු කෙරෙන පනත් කෙටුම්පතක් අධිකරණ ඇමැතිවරයා විසින් මේ මස පාර්ලිමේන්තුවට ඉදිරිපත් කිරීමට නියමිතව තිබේ.
මෙම පියවර මගින් එහි කාර්ය මණ්ඩලයේ වැටුප් තීරණය කිරීමට මහ බැංකුවට ඇති බලය ඉවත් කෙරෙන අතර එම බලය මුදල් අමාත්‍යංශයට සහ පාර්ලිමේන්තුවට පැවරෙන බව අධිකරණ ඇමැති විජයදාස රාජපක්ෂ පැවසීය.
ඒ අනුව ශ්‍රී ලංකා මහ බැංකුව විසින් සිය කාර්ය මණ්ඩලය සඳහා මෑතකදී සිදුකිරීමට යෝජනා කළ වැටුප් වැඩිවීම අවලංගු වුවද මුදල් අමාත්‍යංශය සමඟ සාකච්ඡා කර සාධාරණ වැටුප් වැඩිවීමක් ගැන සළකා බැලෙනු ඇති බව ඔහු සඳහන් කළේය.
යෝජිත පනත් කෙටුම්පත යටතේ, රජය සතු ව්‍යවසායවලට පරිපාලන බලතල සහ මූල්‍ය ප්‍රතිපත්ති තීරණ ගැනීමේ බලතල පමණක් ලබා දෙනු ඇත.
ඔවුන්ගේ වැටුප් වැඩි කිරීමේ බලතල ආයතනවලට ලබා නොදෙන බව ඇමැතිවරයා පැවසීය.
මේ මාසයේ ඉදිරිපත් කිරීමට නියමිත පනත් කෙටුම්පතට අනුව රාජ්‍යව්‍යවසායයන්ට පාර්ලිමේන්තු මූල්‍ය බලතල ඉක්මවා යෑමට ඉඩ නොතබන බව ඔහු සඳහන් කළේය.
පවතින එක් ප්‍රශ්නයක් නම් රාජ්‍ය ව්‍යවසායයන්ගේ මූල්‍ය බලතල පිළිබඳ නිසි අර්ථකථනයක් නොමැති වීම බවත්, එමනිසා එම ආයතන රැසක් පාර්ලිමේන්තු බලතල මඟ හැරීමට උත්සාහ කරන බවත් ඔහු පැවසීය.
යෝජිත පනත් කෙටුම්පත පිළිබඳ පාර්ලිමේන්තුවේ පක්ෂ නායකයන් අඟහරුවාදා දැනුවත් කිරීමට නියමිත අතර අනෙකුත් ඇමැතිවරුන් ද පාර්ලිමේන්තු මූල්‍ය බලතල පවත්වාගෙන යෑම පිළිබඳ යෝජනා ඉදිරිපත් කිරීමට නියමිතය.
අපනයනකරුවන් විදේශයන්හි මුදල් රඳවා තබා ගැනීම, නීති විරෝධී ක්ෂුද්‍ර මූල්‍ය සමාගම් ව්‍යාපාර නැවැත්වීමට ගත් ක්‍රියාමාර්ග, කල්බදු ගැටලු සහ උකස් මධ්‍යස්ථාන පිළිබඳ ගැටලු ආදිය ඉතිරිව තිබියදී මහ බැංකු කාර්ය මණ්ඩලය සිය වැටුප් වැඩි කිරීමට පියවර ගෙන ඇති බව ඇමැති රාජපක්ෂ පැවසීය.
මේ අතර, විපක්ෂයේ ප්‍රධාන සංවිධායක ලක්ෂ්මන් කිරිඇල්ල ප්‍රකාශ කළේ, මෙම මූල්‍ය බලතල ආරක්ෂා කර ගැනීම සඳහා තමන් දිගින් දිගටම උද්ඝෝෂණවල නිරත වන බැවින්, පාර්ලිමේන්තු මූල්‍ය බලතල පවත්වාගෙන යෑමට සහය ලබාදෙන බවයි.
ශ්‍රී ලංකා මහ බැංකුවේ වැටුප් වැඩිවීමේ කාලසීමාව හා සමානුපාතය වැරදි බවත්, එම නිසා ඔවුන් ඊට විරුද්ධ බවත් ඔහු පැවසීය. .(ceylonwire)
