ශ්‍රී ලංකා පොලිස් දෙපාර්තමේන්තුවේ ප්‍රශ්න ගනනාවකට මුහුණ දුන් පීඩාවට පත් වූ අපේ කාලේ එකම පොලිස්පතිවරයා වන්නේ වර්තමාන පොලිස්පති වික්‍රමරත්න මහතාය. ඔහු කෙතරම් නින්දාවට සහ අවඥාවට පත් වීද යත් සමස්ත රටම ගිනි තැබූ DIG අත් අඩංගුවට ගැනීමටවත් ඔහුට නොහැකි විය. 20 වැනි ආණ්ඩුක්‍රම ව්‍යවස්ථාව රටක් ගිනි තබා වංචා දූෂණ සහ අක්‍රමිකතා වලට අත වැනුවේය. එම ව්‍යවස්ථාව රටට කොතරම් හානි වීද යත් තවමත් රට යන්නේ අයාළේය.
මේ අතර සියලුම උත්සව තහනම් කර තිබියදීත් 156 වැනි පොලිස් දිනය සමරන්නේ පොලිස්පතිවරයාගේ අවශ්‍යතාවය මත පළාත් මට්ටමිනි. නමුත් මේ වන එම උත්සවය පොලිස් නිලධාරීන්ට දැඩි කරදරයක්ව තිබේ. සබරගමු පළාතේ පොලිස් දින සැමරුම හෙට (29) ඇඹිලිපිටියේදී පැවැත්වීමට කටයුතු සංවිධානය කර තිබෙන අතර එම උත්සවයේද සංවිධාන කටයුතු විවිධ පොලිසිවලට භාර දී තිබේ. නමුත් ඒ සඳහා මුදල් ලබා දී නැති අතර එම අවශ්‍යතා සඳහා පොලිස් නිලධාරීන් MO කර මුදල් ලබාගෙන තිබේ. (MO කිරීම යනු පොලිස් නිලධාරීන්ගේ පරිපාලනයට අවශ්‍ය මුදල් හෝ වෙනත් උපකරණ නොමැති වූ විට නීතිවිරෝදී ලෙස බලහත්කාරයෙන් නමුත් හිත නොරිදා සිවිල් වැසියන්ගෙන් මුදල් ලබාගන්නා ක්‍රමයකි).
එම ක්‍රමය පොලිස් නිලධාරීන්ගේ ප්‍රතිරූපය තව තවත් විනාශ කර තිබෙන නමුත් සබරගමු පළාතේ බොහෝ පොලිසිවල පොලිස් නිලධාරීන්ගේ බැරැක්ක පවා විනාශව ගොස් තිබේ. හෙට ඇඹිලිපිටියට පැමිණෙන ඔබතුමාට සහ සබරගමුවේ පොලිස් ප්‍රධානීන්ට ඇඹිලිපිටිය පොලිස් ස්ථානය තුල සංචාරයක නිරතවන්නේ නම් එම පොලිස් ස්ථානයේ වහලය, වැසි දිනවලට ගංගාවක සේ ජලය පිරෙන එහි තත්වය ඔබලාට බලාගත හැකිවනු ඇත. එම පොලිසියේ පමණක් නොව සබරගමුවේ බොහෝ පොලිස් පොඩ්ඩන්ගේ බැරැක්කවල ඔවුන් ගෙවන්නේ අපාගත ජීවිතයකි.
එසේම සමහර පොලිස් ස්ථානවල පොලිස් කාන්තාවන්ට රාත්‍රීයේ හදිසියෙවත් නැවතී සිටීමට හැකි වාතාවරණයක් නැත. මෑතකදී එක්තරා පොලිස් ස්ථානයකදී බීමත් පොලිස් නිලධාරීන් අඹු සැමි යුවලකට පහර දී තිබෙන්නේ රාත්‍රී 11.30 ට පමණ වන අතර ඔවුන්ට පහර දෙන්නේ 8 හැවිරිදි දියණියද ලග සිටියදී වන අතර මවට එල්ල කල පහරවල් දෙකක් එම දරුවාටද වැදී තිබේ. නමුත් එදින එලිවෙනකන්ම කිසිදු පොලිස් නිලධාරිනියක් එම පොලීසිය තුල සිට නැති අතර එම දියණියගේ වීඩියෝවක් අප ලබාගෙන තිබෙන අතර බීමත් පොලිස් නිලධාරීන් තම මවට සහ පියාට සිදුකල දේවල් එම දැරිවිය පැහැදිලිකර තිබේ. දැරිවියක් සහ සැමියෙක් ඉදිරිපිටදීම මවක් දූෂණය කිරීමට තැත් කිරීමට තරම් එම නිලධාරීන් දූෂිත සහ තිරිසන් වන්නේ පොලිස් කාන්තාවනට රැදී සිටීමට පහසුකම් නොමැතිවීමය.
කෙසේ වෙතත් පොලිස් ලොක්කොද, පොඩ්ඩෝ ද අපේ මිතුරෝය. මහජනතාවට නිසි ලෙස සේවය කිරීමට නම් පොලිස් නිලධාරීන් යහපත්ව සිටිය යුතුය. MO කරමින් මුදල් ලබාගෙන කරන මෙවන් උත්සව සාර්ථක වීමට නම් අඩුම තරමින් පොලිස් නිලධාරීන්ගේ ප්‍රශ්න හෝ විසඳීමට සමත්විය යුතුය. මේ බැරැක්ක ප්‍රශ්නයවත් විසදා දෙන ලෙස පොලිස් පොඩ්ඩෝ ඔබගෙන් ඉල්ලා සිටී.
