රත්නපුර, වැලිගෙපොල, අම්බැවිල ශ්‍රී වජිරවංශ ප්‍රාථමික විද්‍යාලය යනු, එම විද්‍යාලය ආරම්භක කාලයේ පටන් විවිධ ගැටුම් ඇති වූ පාසලකි. ප්‍රාථමික විද්‍යාලයක් අවශ්‍ය නොමැතිව තිබියදී, ප්‍රජා ශාලාවක් වැනි කාමර දෙකක කුඩා ගොඩනැගිල්ලකට පළමු වසර ආරම්භ කරනු ලැබුවේ දේශපාලන හිතවතෙක් වු ගුරුවරයෙකුට විදුහල්පතිකමක් ලබා දීමේ අරමුණින් ය. මහා විද්‍යාලයෙන් ගැලවී ගොස් එක වසර වෙනමම ආරම්භ කිරීමත් සමගම මහා විද්‍යාලයේද විනාශය ලිවීම ආරම්භ වුයේ පළමු වසරට 130 – 150 ක් වැනි ප්‍රමාණයක් සදහා ඉල්ලුම්පත් යොමු වුවත් 70 කට වඩා වැඩි ප්‍රමාණයකට ඉඩ ලබා දීමට නව ප්‍රාථමික අංශයට අවශ්‍ය ඉඩ නොතිබූ බැවිනි.
මේ වනවිට එම පාසලේ ප්‍රාථමික අංශයේ දියණියකට සිදුව තිබෙන අසාධාරණ සිදුවීමක් සමාජ මාධ්‍ය තුල සංසරණය වෙමින් තිබේ. එම වීඩියෝවට සහ එහි සඳහන් සටහන් වලට අනුව මෙම පාසල තුල දැඩි ආරවුල් සහගත බවක් දක්නට තිබේ.
වයස අවුරුදු 8 ක් පමණ වන 3 වසරේ ඉගනුම ලබන පුංචි දැරියක් තම ජීවිතයේ පළමුවෙන්ම ඉදිරිපත් වූ තරගවලින් ජයග්‍රහණ කිහිපයක් ලබාගෙන මාස ගණනක් පසු වී ඇතත් ඇයට හිමි සහතික පත් ලබා නොදී එම තරග සදහාම පෙනී සිට ජයගත් ගුරුවරියකගේ හිතවතියක්ගේ දරුවාට පමණක් සහතික ලබාදීම හේතුවෙන් සිත්තැවුලට පත් එම දැරිය පාසල් යෑමට පවා නොහැකි බව පවසයි. එම හේතුවෙන් එම දරුවාගේ දෙමාපියන් දැඩි අපහසුතාවකට පත්ව සිටී. දියණිය ඇයගේ දෙමාපියන්ගෙන් මේ පිළිබඳව දින කීහිපයක් විමසා ඇති අතර ඇයගේ සිත සනසා ඇත්තේ පසුව ලැබේවී යැයි පවසමිනි.
දැනට මාසයකට පමණ පෙර දැරිය පාසල් ගේට්ටුවෙන් පිටතට පැමිණ ඇත්තේ හඩාගෙනය. එම පාසලේ ඉගනුම ලබන සමවයසේ දියණියකගේ නමක් කියමින් ඇය පවසන්නේ ඇයට සහතික පත් ලබාදුන් බවයි. ඇස්වල කදුලු පුරවාගත් දියණිය පවසන්නේ “ආයෙනම් කවදාවත් ක්‍රීඩා තරග වලට යන්නේ නෑ මහන්සිවෙලා දිව්වෙ අපරාදේ” කියාය.
තවද මෙහි ගුරුවරුන් සහ විදුහල්පති විසින් මෙම වසරේ මුල් කාර්තුවේ ගාලු නගරය සහ ඒ අවට නැරඹීම සදහා චාරිකා තුනක් මෙම පාසලෙන් සංවිධානය කර තිබුණේ මාස එක හමාරක් වැනි කෙටි කාලයක් තුලය.
තවද මෙම පාසල තුල තිබෙන ඉඩකඩද සීමිත වන අතර මෙම පාසල මෙන්ම ප්‍රධාන පාසලද විනාශ මුඛයට යමින් තිබෙන්නේ සබරගමු පළාත් අධ්‍යාපන බලධාරීන්ගේ දුෂිත පරිපාලනය හේතුවෙනි. එය වර්තමානයේ නොව අවුරුදු කිහිපයකට පෙර ඔවුන්ගේ දේශපාලනය සහිත ආණ්ඩු පිහිටවීම සදහා සිදුකරන ලද මහජන පීඩාවන් වේ. පැවති යහපාලන ආණ්ඩුව ජනතාවට එපා කරවීම උදෙසා එවකට අධ්‍යාපන බලධාරීන් දරුවන් බිලි දුන්නේ ඒ ආකාරයෙන්ය.
මෙම ප්‍රාථමික විද්‍යාලය තුල ඉඩ නොමැති වීම නිසා මහා විද්‍යාලයද සීග්‍රයෙන් විනාශ මුඛයට යමින් තිබෙන්නේ ප්‍රාථමික අංශයෙන් අවශ්‍ය ප්‍රමාණයට දරුවන් ප්‍රධාන පාසලට නොපැමිණෙන බැවිනි.
ප්‍රදේශයේ කීර්තිමත් පාසලක් බවට පත්ව තිබු මෙම පාසල විනාශවීමට බලපෑ කරුණු රාශියක් අපවෙත ලැබී තිබේ. යමක් කිරීමට හැකි දෙමාපියන්ගේ දරුවන් නගරයේ පාසල්වලට යන අතර අසරණ දෙමාපියන්ගේ දරුවන් මෙම පාසලට යන්නේ ඔහුනට ශක්තියක් වීමට හෝ තමන් වෙනුවෙන් හඩක් නැගීමට කිසිවෙකුත් නොමැති පසුබිමකය.
මෙම ප්‍රාථමික අංශය අයාලේ යමින් තිබුණේ මෙම පාසල ආරම්භයේමය. පාසල ආරම්හ වී මේ වන අවුරුදු 5 ක් පමණ විය හැකිය. ප්‍රධාන පාසලෙන් ප්‍රාථමික අංශ ඉවත් කිරීම නිසා දෙමාපියන්ට වැඩි බරක් දැරීමට සිදුවිය. ඒ දැනට පවතින ගොඩනැගිලි පවා ඉදිවී තිබෙන්නේ දුප්පත් දෙමාපියන්ගේ දහඩිය මහන්සියෙන් සූරා ගත් මුදල නිසාය.
තම දේශපාලන වුවමනාවන් ඉටුකරන අධ්‍යාපන බලධාරීන් ඉහළ පුටුවල වැජඹෙති. තවත් සමහරු විශ්‍රාම ගොස්ය.
දක්ෂ විදුහල්පතිවරයකු මහා විද්‍යාලයට පැමිණ සිටින නමුත් පාසල නැවත යථා තත්වයට ගැනීම ඔහුට ලේසි නොවනු ඇත. ඒ කාලයක් තිස්සේ අයාලේ ගිය ජනතාව මෙන්ම ගුරුවරුද යහ මගට ගැනීම ලේසි පහසු කටයුත්තක් නොවන බැවිනි.
කෙසේ නමුත් මෙම දියණියගේ හඩට සහ අප සොයා ගත් තොරතුරුවලට අනුව සබරගමු පළාත් අධ්‍යාපන බලධාරීන් මෙම විද්‍යාලය වෙනුවෙන් කර තිබෙන එකම දෙය නම් මෙම පාසල සෑම අතකින්ම වැටීමට අවශ්‍ය කටයුතු පමණි.
සබරගමුවේ පළාත් අධ්‍යාපන බලධාරීන් මෙම පාසල විනාශ කිරීම සදහා කටයුතු කළ ආකාරය පිළිබඳව තොරතුරු දැනගැනීමට අවශ්‍ය නම් ඒවා අප ආයතනය සතුව තිබේ.
අපගේ ගවේෂණයට අනුව මෙම පාසල රැක ගැනීමට නම් ප්‍රාථමික අංශයට අවශ්‍ය ගොඩනැගිලි හා දක්ෂ ගුරුවරු ලබා දිය යුතුය. එසේ නොමැතිනම් දරු දැරියන් 1000 කට වඩා සිටි ප්‍රධාන පාසලට මෙම ප්‍රාථමික විද්‍යාලය නැවත ගෙන ගොස් සමස්ත පාසලම නැවත එකම පරිපාලනයකට යටත් කල යුතුය.
මේ වන විට පාසල් දෙකේම දරු දැරියන්ගේ එකතුව සීඝ්‍රයෙන් අඩු වී තිබේ. සබරගමුවේ අධ්‍යාපනය වැනසුවේ රත්නපුරයේ සමහර දුෂිත දේශපාලන නායකයන් සහ ඔවුන් වෙනුවෙන් ආණ්ඩුබලය ලබා දීමට මහජනතාව පීඩාවට පත්කරමින්, කටයුතු කල පළාත්, කළාප , කොඨිඨාශ අධ්‍යාපන බලධාරීන් සහ සමහර විදුහල්පතිවරුන් සහ ගුරුවරුන්ය.
