අයිස් මත්ද්‍රව්‍ය කිලෝ එකකට අධික ප්‍රමාණයක් සහ මුදල් සමග පොලිස් විශේෂ කාර්ය බළකාය විසින් අත්අඩංගුවට ගෙන ඇති බව වාර්තා වේ.
මෙලෙස අත්අඩංගුවට ගෙන ඇත්තේ දැනට විදෙස්ගතව සිටින ප්‍රබල මත්ද්‍රව්‍ය ජාවාරම්කරුවෙක් සහ සංවිධානාත්මක අපරාධකරුවෙකු වන මාතර කල්ප යන පුද්ගලයාගේ මෙරට මත්ද්‍රව්‍ය ජාවාරම මෙහෙයවූ කුඩු ධනූ යන අන්වර්ථ නාමයෙන් හඳුන්වන කාන්තාවකි.
වැල්ලම්පිටිය පොලිස් වසමේ කුඩා බුත්ගමුව, අංගොඩ ප්‍රදේශයේ සිදුකළ වැටලීමකදී මෙම කාන්තාව අත්අඩංගුවට ගෙන තිබේ.
අයිස් මත්ද්‍රව්‍ය කිලෝ 01 යි ග්‍රෑම් 50 ක්, විද්‍යුත් තරාදියක්, ජාවාරමින් උපයාගන්නා ලද බවට සැක රුපියල් 12,000 ක් සහ ජංගම දුරකථනයක් මෙහිදී පොලිස්භාරයට ගෙන ඇත.
අත්අඩංගුවට ගත් සැකකාරිය සහ මත්ද්‍රව්‍ය තොගය ඉදිරි විමර්ශන කටයුතු සඳහා පොලිස් මත්ද්‍රව්‍ය නාශක කාර්යාංශය වෙත භාරදී ඇති බව සදහන්.
