(ශ්‍රී ලංකාවේ වත්මන් අධ්‍යාපන ක්ෂේත්‍රවල බිදවැටීම පිළිබදව පෙන්වා දෙන “වත්මන් පාසල් පද්ධතියේ අක්‍රමිකතා හා දූෂණ” ලිපි මාලාවේ හත්වන වෙළුම)
2024 වර්ෂය ආරම්භ වන්නේ දීර්ඝ පාසල් නිවාඩුවක් සමගය .කෙටියෙන්ම සටහන් කරන්නේ නම් ජනවාරි මාසයම රජයේ පාසල් නිවාඩු ලබා දි ඇත. දන්නා තරමට පාසල් ආරම්භ වන්නේ පෙබරවාරිය. ඒ අනුව පළමු වාරය පටන් ගත යුතුව තිබෙන්නේ පෙබරවාරිය. එනිසා පෙබරවාරී මාසය අධික කාර්ය බහුල මාසයක් විමට නියමිතව ඇතත් 2024 ජනවාරී මාසය අතිශය සාමාන්‍ය මාසයක් බවට පත්ව ඇත්තේ අ.පො.ස.උසස් පෙළ විභාගය 2024 වර්ෂයේ ජනවාරී මස පැවැත්වෙන නිසාවෙනි.
කොරෝනා අර්බුදයත් සේම සහරාන්ගේ පහර දිමත් නිසා තවම හරි හැටි පිළිවෙලක් කර ගැනිමට නොහැකි වූ නිදහස් අධ්‍යාපනයෙන් බොහෝ අයට වාසී රැසක් හිමිව ඇත. දරුවන්ට සහන නැති නමුත් මෙම 2024 ජනවාරී මාසය පුර‍ාවට සිය උපකාරක පන්ති පවත්වමින් ඒවා ප්‍රවර්ධනය කරමින් පවත්වාගෙන යාමේ කදිම අවස්ථාවක් ගුරුවන්ට උදා වි ඇත.එයට හොදම උදාහරණය බවට පත්ව ඇත්තේ පසුගිය වර්ෂ කිපයෙහි පාසල මූලික වෙමින් සකසන්නට යෙදුණු වට්ස්සැප් ගෲප් සමූහයයි. එනිසා ම අනිතිකව එම වට්ස්සැප් ගෲප් හරහා සිය ප්‍රවර්ධන කටයුතු සිදු කර ගනිමින් සිය උපකාරක පන්ති කදිමට පවත්වාගෙන යාමට පාසල් ගුරුවරු සමත්ව තිබේ. ඒ මෙම ඇප් සමුහ හරහාය.
එසේම පාසල් පවතින කාලවකවානුවලදී බොහෝ ගුරුවරුන් පැවරුම් යොමුකරනුයේ මෙම සමුහයන් තුලටය. එසේම බොහෝ ගුරුවරුන් පැවරුම් යොදනුයේ රාත්‍රීයේය. රාත්‍රිය යනු මිනිසුන්ට නිදා ගැනීමට තිබෙන කාලයයි. ප්‍රාථමික ශ්‍රේණිවල දරුවන්ට පවා රාත්‍රී කාලයේ පැවරුම් යොදන නමට පමණක් උගත්, ගුරුකම නුගත් ගුරුවරුන් ඕනා තරම් සිටිති. බහුතරයක් ගුරුවරුන්ගේ දුෂිත ක්‍රියා නිසාම අපට උරුමව සිටින්නේද වගකීම් විරහිත දරු, තරුණ පරපුරකි. එයට වගකිව යුත්තේ අතීතයේ සිටම ගුරුවරුන් සේ කටයුතු නොකළ ගුරුවරුන්, සහ අධ්‍යාපන බලධාරීන්ය.
40 දශකයේ එවකට අධ්‍යාපන ඇමතිවරයෙකුව සිටි සී.ඩබ්.ඩබ්. කන්නංගර ශ්‍රීමතාණන්ට පිංසිදු වන්නට අපට තවමත් නිදහස් අධ්‍යාපනය තිබේ. වර්තමානයේ අප ගත කරන්නේ 2024 වර්ෂයේය. මේ වන විට ඉතාමත් දරුණු ලෙස නිදහස් අධ්‍යාපනය වළපල්ලට ගමන් කරන සේයාවක් දක්නට ලැබේ. එයට ප්‍රධානතම හේතුව වන්නේ පාසලේ උගන්වන ගුරුවරයාම සිය උපකාරක පන්තිය වැඩි දියුණු කර ගැනීම සදහා සතියේ දිනවල හවස් වරුවේ හෝ සති අන්ත දිනවල පාසල අසළම උපකාරක පන්ති පැවැත්වීමයි. මෙයට ප්‍රධානතම හේතුව ජිවත් වීමට අපහසු තත්ත්වයකට පාසල් ගුරුවරයා පත් කොට තිබීමයි. එනිසා ජීවත් වීම උදෙසා බොහෝ ගුරුභවතුන් උපකාරක පන්ති පැවැත්වීමට තීරණය කොට ඇත. සත්‍යය වශයෙන්ම එය ගුරුවරයාගේ වරදක් ලෙස හුවා දැක්විය නොහැක. නමුත් මෙම ක්‍රමය ආරම්භ වන විට ගුරුවරුන්ට වැටුපේ ගැටළුවක් තිබුනේ නැත. ඒ අයට ජීවත් වීමට සරිලන වැටුපක් රජයෙන් ලබා දෙන්නේ නම් ඉතා ගුණාත්මක අධ්‍යාපන ක්‍රමයක් ලබා දිමට එම ගරු භවතුන්ට හැකිය. නමුත් සිදුව ඇත්තේ රජයන් වල පැවති දුර්වලතාවයන් නිසා අවසානයේ ශිෂ්‍ය ශිෂ්‍යවෝ මෙන්ම අහිංසක දෙමාපියන් දැඩි පීඩනයකට පත්ව සිටීම වුවත් ලංකාවේ අධ්‍යාපන බලධාරීන් හෝ දේශපාලන නායකයන් ලංකාවේ හෙටක් ගැන සිතුවේ නැත.
මේ වන විට රජයෙන් ජාතික පාසල් අහෝසි කොට ලංකාවේ සියලුම පාසල් අදාළ පළාත් සභා යටතට ගැනීමේ සූදාකමක් ගැන කථා කරති. එය බොහෝම සාධනීය දෙයකි. එවිට මෙම ටියුෂන් මාෆියාව ටික දුරකට හෝ බිදිය හැකිය. නැතිනම් සිදු වන්නේ අහිංසක දෙමාපියන් දිනෙන් දිනම ආගාධයට පත් වීමයි. එමෙන්ම රජය විසින් පන්ති කාමර වල ප්‍රායෝගික ක්‍රියාකාරකම් සිදු කොට ඒවාට ලකුණු දීමේ වැඩපිළිවෙලක් ගැන කථා කරති. පැහැදිලිවම එය ඉතා හොද දෙයකි. නමුත් රජය මිට වඩා ගුරු වැටුප් පිළිබදවද සාධනීයව සිතන්නේ නම් මෙහි ප්‍රතිළුල ඉතා ඉහළ මට්ටමකට ගත හැකි බව දැඩි ව සිතිය යුතුය. පන්තිකාමරවල ක්‍රියාකාරකම්වලට ලකුණු දීමේදී තමන්ගේ උපකාරක ටියුෂන් පන්තියට නොඑන දරුවන්ට වෙනස්කොට සලකා ලකුණු දීම් සිදුකරති.
කෙතරම් ප්‍රතිසංස්කරණ ගෙනාවද සිදු කළ යුත්තේ ගුරුවරයා ශක්තිමත් කිරීම විණා අනෙකක් නොවේ. මක්නිසාද යත් ගුරුවරයා ශක්තිමත් කළ විට රටේ අධ්‍යාපනය පැහැදිලිවම නිවැරදි මගකට ගෙන යා හැකි බව නොරහසකි. ලංකාවේ ගුරු වරුන් සිටින්නේ දෙලක්ෂ පනස්දහසක් පමණකි. එවිට මෙම නිදහස් අධ්‍යාපනය සදහා නොගැලපෙන වැඩ සිදු කරන ගුරුවරුන් පිළිබදව යම් තීරණයක් ගත හැකිය. මේ වන විට නිසි පුහුණව ලත් ගරුභවතුන් පන්දහසකට (5000) අධික ප්‍රමාණයක් රට හැර ගොසිනි. තවත් බොහෝ දෙනා රට හැර යාමට බලාපොරොත්තුවෙන් සිටිති. එසේ නම් අශ්වයා ගියාට පසු ඉස්තාලය වහන්නේ නැතිව ගුරුභවතුන් රැකගනිමින් ටියුෂන් මාෆියාවද විනාශ කර ගනිමින් මව්පියන්ගේද පොකට්ටුව සුරකිමින් ලාංකේය දරු පරපුරේ අධයාපනය සුරක්ෂිත කල යුතුව තිබේ. නමුත් එසේ කිරීමට දේශපාලකයන්ට හෝ අධ්‍යාපන බලධාරීන්ට අවශ්‍ය බව අපට නම් පෙනෙන්නේ නැත.
ඒ අනුව වට්ස් ඇප් හරහා සිදුවන සියලුම බලපෑම් නවත්වා වට්ස් ඇප් හරහා දරුවන්ට හිංසා කිරීම නැවැත්විය යුතුමය. එසේම එම සමුහයන් හරහා දරුවන් ඉලක්කරගෙන සිදුකරන ව්‍යාපාරද නැවැත්විය යුතුය.
