සියයට සියයක්ම ස්වාධින මාධ්‍ය ආයතනයක් ලෙස කටයුතු කරන අප දකින්නේ වර්තමාන රජය මහජනතාව පාලනය කිරීම උදෙසා, අනාගතයක් ගැන නොසිතා, විවිධ නීති අණපනත් රැගෙන එන බවයි. මෙසේ ගෙන එනු ලබන අණපනත් වලින්, ඒ වෙනුවෙන් අත් උස්සා අනුමත කරන උදවියගේම බෙලි කැපෙන බව ඔවුන් හදුනාගෙන නැත. එසේ හදුනා නොගත් තවත් පනතක් ලෙස ඔවුන් ඉදිරිපත් කර තිබෙන්නේ ත්‍රස්තවාදය වැළක්වීමේ තාවකාලික විධිවිධාන පනතයි.
එවන් පසුබිමක් තුල නැවතත් ගෙන ඒමට උත්සාහ කරන මෙම ත්‍රස්තවාදය වැළැක්වීමේ තාවකාලික විධිවිදාන පනත තුළ මිනිසුන්ගේ මුලික අයිතිවාසිකම් උල්ලංඝනය වන බරපතල ප්‍රතිපාදන අන්තතර්ගතකර තිබෙන බවත් මෙම පනත පරාජය කිරීමට නීතිඥයින් ලෙසත්, සමගි ජන බලවේගය පක්ෂයක් ලෙසත් ගතහැකි සියලු ක්‍රියාමාර්ග ගන්නා බව නීතිඥ තාරක නානායක්කාර මහතා ප්‍රකාශ කරන ලදී.
මාධ්‍ය හමුවකට එක් වෙමින් ඔහු ඉදිරිපත්කල අදහස් පහතින් දැක් වේ.
ඒ මහතා මෙම මාධ්‍ය හමුවේදී වැඩිදුරටත් දැක්වූ අදහස්,
“ත්‍රස්ත විරෝධී පනත් කෙටුම්පත පාර්ලිමේන්තුවට ඉදිරිපත් කළා. උතුරේ ත්‍රස්තවාදය පාලනය කිරිමට නීති නොමැති නිසා තමයි 1979 අංක 48 දරන ත්‍රස්තවාදය වැළැක්වීමේ තාවකාලික විධිවිදාන පනත ගෙනාවේ. මේ පනත වසර 40 ක් පමණ භාවිතා කරලා තිබෙනවා. 2019 පාස්කු ඉරිදා බෝම්බ ප්‍රහාරය සිදුවනවිටත් තාවකාලික විධිවිදාන පනත තිබුණා. මේ පනත රාක්ෂස පනතක්. මිනිසුන්ගේ මුලික අයිතිවාසිකම් උල්ලංඝනය කරමින් කටයුතු කරන බරපතල ප්‍රතිපාදන තිබෙන පනතක් තමයි ත්‍රස්තවාදය වැළැක්වීමේ තාවකාලික විධිවිදාන පනත. මේ පනත හරහා තවම පාස්කු ප්‍රහාරයට වගකිව යුතු පුද්ගලයන් අත්අඩංගුවට ගන්න නොහැකි වෙලා තිබෙනවා. ප්‍රති ත්‍රස්ථ පනත සහ ත්‍රස්ත විරෝධි පනත යන පනත් දෙක ආණ්ඩු ගෙන ඒමට උත්සහ කළා. මේ පනත් වන ත්‍රස්තවාදය වැළැක්වීමේ තාවකාලික විධිවිදාන පනතටත් වඩා දරුණු ප්‍රතිපාදන ගේන්න ආණ්ඩුව උත්සහ කළා.
ජනවරමක් නැති ආණ්ඩුවට සහ ජනවරමක් නැති ජනාධිපතිට විරුද්ධව රටේ ජනතාව නැගිටින බව ඔවුන් දන්නවා. ඒ වගේම ජනතාවට පීඩනයට පත් කරමින් වැඩි බදු වැඩි කරමින් ආර්ථිකය බංකොලොත් කරමින් ගමන් කරන ගමන නිසාත් ජනතාව පාරට බහින බව ආණ්ඩුව දන්නවා. ඒ නිසා ත්‍රස්තවාදය මර්දනය කරන්න පනතක් ගේන බව පවසා ජනතාවගේ ප්‍රජාතන්ත්‍රවාදී නැගිටීම් , විරෝධතා සහ ජනමාධ්‍ය වලින් එල්ල වන විරෝධතා පාලනය කරන්න ආණ්ඩුව විසින් ත්‍රස්ත විරෝධී පනත හරහා ප්‍රතිපදන වෙන් කරගෙන තිබෙනවා.
පරණ පනත අනුව ත්‍රස්තවාදී වරදක් සිදුකරනු ලබන ඕනෑම අවස්ථාවක අධිකරණ නියෝගයකින් තොරව ආරක්ෂක ඇමැතිවරයාට රැඳවුම් නියෝග නිකුත් කරන්න පුලුවන්. අලුත් ත්‍රස්ත විරෝධී පනත හරහා ආරක්ෂක ලේකම්වරයාට පුලුවන් අධිකරණ නියෝගයකින් තොරව මාස දෙකක් රැඳවුම් නියෝග නිකුත් කරන්න. ආරක්ෂක ලේකම්වරයා පත් කරන්නේ ජනාධිපති. ජනාධිපතිගේ එහෙයියෙක් තමයි ආරක්ෂක ලේකම්වරයා.
ඔහුට පුලුවන් වෙනවා ත්‍රස්ත විරෝධී පනත හරහා වරදක් කළැයි කවුරුන් හෝ පුද්ගයෙකුට චෝදනා නගලා මාස දෙකක් රැඳවුම් භාරයේ තබා ගන්න. ඒ පුද්ගලයා වෙනුවෙන් අධිකරණයේදී සටන් කළත් ඒ වෙද්දී ඒ පුද්ගලයා රැඳවුම් භාරයේ මාස දෙකක් ඉදලා ඉවරයි.
ජනතාව බය කිරිමේ , ප්‍රජාතන්ත්‍රවාදී විරෝධතා කඩාකප්පල් කිරිමේ , ප්‍රජාතන්ත්‍රවාදී නැගිටීම් පාලනය කිරිමේ ක්‍රමවේදයක් විදිහට රැඳවුම් නියෝග භාවිතා කරන්න මොවුන්ට හැකියාව තිබෙනවා. ආණ්ඩුවට විරුද්ධය දෙයක් ප්‍රකාශ කළොත් ආරක්ෂක ලේකම්ට පුලුවන් ආණ්ඩුවට විරුද්ධව ප්‍රකාශ නිකුත් කළ පුද්ගලයා වෙනුවෙන් මාස දෙකක රැඳවුම් නියෝග ලබාගන්න. ආණ්ඩුව මේ ආකාරයට කොටු කරන්න හදන්නේ ත්‍රස්ථවාදීන්ව නෙවෙයි. ප්‍රජාතන්ත්‍රවාදීව මත පල කරන සිවිල් ක්‍රියාකාරීන්ව.භාෂණයේ සහ ප්‍රකාශනයේ නිදහස සහ සංවිධානගතවීමේ නිදහස කොටුකරන්න නිර්මාණය කරපු වැඩපිළිවෙලක් තමයි ත්‍රස්ත විරෝධි පනත් කෙටුම්පත තුළ අන්තර්ගත වෙන්නේ.
ත්‍රස්වාදීන්ව පාලනය කරන්න තිබෙන ක්‍රමවේදයක් සාමන්‍ය පුරවැසියන් වෙනුවෙන් යෙදෙව්වොත් එයින් වන ප්‍රජාතන්ත්‍රවාදී කඩාවැටීම හිතා ගන්නවත් බැරිවෙයි. ත්‍රස්ථ විරෝධි පනත් කෙටුම්පත වැනි රාක්ෂස පනතක් ගේනන ඉඩ දුන්නොත් රටේ ජනතාවට ජනවරමක් නැති ආණ්ඩුවේ සහ ජනවරමක් නැති ජනාධිපතිගේ පාලනයට නතු වෙන්න සිද්ධ වෙනවා. මේ පනත පරාජය කරන්න නීතිඥවරු ලෙසත් සමගි ජන බගවේගය ලෙසත් සියලු ක්‍රියාමාර්ග අපි ගන්නවා. මේ පනත ශ්‍රේෂ්ඨාධිකරණයේදී අභියෝගයට ලක් කරන්න සමගි ජන බලවේගය කටයුතු කරනවා. “
