බෙලිඅත්ත පංච පුද්ගල ඝාතනය සම්බන්ධයෙන් සිදු කෙරෙන විමර්ශනවලට අදාළව ඝාතනයට ආධාර අනුබල දීමේ චෝදනා යටතේ සැකකරුවන් දෙදෙනෙකු අත්අඩංගුවට ගෙන ඇති බව වාර්තා වේ.
මෙම පුද්ගලයින් දෙදෙනා හෙරොයින් සමග ගාල්ල වංචාවල ප්‍රදේශයේදී පොලිස් විශේෂ කාර්ය බළකායේ අත්අඩංගුවට පත්ව ඇති බව සදහන්.
අපේ ජනබල පක්ෂයේ නායක සමන් පෙරේරා නොහොත් රෝයල් බීච් සමන් ඇතුළු පුද්ගලයින් පස්දෙනෙකු මෙම වෙඩිතැබීමෙන් ඝාතනයට ලක්වුණි.
මෙලෙස අත්අඩංගුවට ගෙන ඇත්තේ ගාල්ල ප්‍රදේශයේ පදිංචි වයස අවුරුදු 25ක් සහ 35ක් වන පුද්ගලයින් දෙදෙනෙකි.
අත්අඩංගුවට ගන්නා අවස්ථාවේදී ඔවුන් සතුව හෙරොයින් ග්‍රෑම් 09යි මිලි ග්‍රෑම් 300 ක්, යතුරුපැදියක්, ජංගම දුරකථන 03ක් සහ උල් පිහියක් තිබී සොයාගෙන ඇත.
සැකකරුවන් වැඩිදුර විමර්ශන කටයුතු සඳහා ගාල්ල වරාය පොලිස් ස්ථානයට භාරදී ඇති බව සදහන්.
2024.01.22 වන දින සමන් පෙරේරා (රෝයල් බීච් සමන්) ඇතුළු පුද්ගලයින් පස්දෙනා වෙඩිතබා ඝාතනය කිරීම සඳහා සංවිධානාත්මක අපරාධකරුවකු හා මත්ද්‍ර‍ව්‍ය ජාවරම්කරුවකු වන ඌරගහ මයිකල් නමැත්තා සමග තංගල්ල අධිකරණය අසලදී ප්‍ර‍හාරයක් එල්ල කිරීමට මෙම සැකකරුවන්ද අදාළ සැලසුම් සකස් කළ බවත්, කොස්ගොඩ සුජී නමැත්තා විසින් මෙම මයිකල් නැමැත්තා හට ඝාතන කොන්ත්‍රාත්තුව ලබාදී ඇති බවටත් මෙම සැකකරුවන් මගින්ද තොරතුරු අනාවරණය කර ගෙන ඇති බවට වැඩිදුරටත් වාර්තා වෙයි.
