අහුංගල්ලේ නිවසක් සහ කාරයක් ගිනි ගනී.

අහුංගල්ල- මිද්දරමුල්ල ප්‍රදේශයේ නිවසක අද (12) අලුයම ඇතිවූ ගින්නකින් නිවසට හා කැබ් රථයකට ගිනි ඇවිලී හානි සිදුවී ඇතැයි පොලීසිය පවසයි.

නිවස ගිනි ගන්නා බවට අහුංගල්ල පොලීසියට අද (12) අලුයම 3.15 ට පමණ ලැබුණු පණිවුඩයක් අනුව එහි ගොස් ගින්න නිවා දැමීමට කටයුතු කළ බවද පොලීසිය කියයි.

මෙම නිවසේ හිමිකාරියගේ බෑනා වන තරිඳු ධනුෂ්ක ද සිල්වා නැමැති අය ඉකුත් වසරේ අප්‍රේල් මස 14 වන දින මිද්දරමුල්ල ප්‍රදේශයේදී යතුරුපැදියකින් පැමිණි තුවක්කුකරුවන් දෙදෙනකු වෙඩි තබා මරා දැමීමෙන් සති තුනකට පසුව නිවසේ පදිංචිකරුවන් නිවස අතහැර දමා ගොස් ඇති බවද පොලීසිය පවසයි.

මෙම සිද්ධිය පිළිබඳව අහුංගල්ල පොලිස් ස්ථානාධිපති චරිත් හල්විට මහතා ඇතුළු පොලිස් කණ්ඩායමක් වැඩිදුර පරීක්ෂණ පවත්වනු ලබයි.