කරුවලගස්වැව පොලිස් වසමේ බුද්ධි ධීවර ගම්මානය ප්‍රදේශයේ දී වෙඩිතැබීමක් සිදුකර ඇති බව වාර්තා වේ.
පොලිස් මාධ්‍ය කොට්ඨාසය සඳහන් කළේ, ඊයේ (30) රාත්‍රීයේ අදාළ වෙඩිතැබීම සිදුකර ඇති අතර ඉන් තුවාල ලැබූ පුද්ගලයෙක් මේ වනවිට පුත්තලම රෝහලට ඇතුළත් කර ඇති බවයි.
තුවාලකරු අවුරුදු 40ක් වූ පාවට්ටාමඩුව ප්‍රදේශයේ පදිංචිකරුවෙකි.
තුවාලකරු කාන්තාවක් සමග අනියම් ප්‍රේම සම්බන්ධතාවයක් පවත්වා ඇති අතර, එම කාන්තාව සමග ප්‍රේම සම්බන්ධතාවයක් පැවැත්වූ වෙනත් පුද්ගලයෙකු විසින් බෝර 12 ගිනිඅවියකින් මෙම වෙඩිතැබීම සිදුකර ඇති බවට විමර්ශනවලදී අනාවරණය වී තිබේ.
වෙඩිතැබීම සිදුකළ පුද්ගලයා හඳුනාගෙන ඇති අතර, ඔහු මේ වනවිට ප්‍රදේශයෙන් පළාගොස් ඇති බව සදහන්.
සැකකරු අත්අඩංගුවට ගැනීම සඳහා කරුවලගස්වැව පොලීසිය වැඩිදුර විමර්ශන සිදුකරනු ලබයි.