ඉන්දීය නාවික හමුදා නෞකාවක් කොළඹ වරායට.

ඉන්දීය නාවික හමුදාවට අයත් “ INS Delhi “ නම් යුද නෞකාව නිල සංචාරයක් සඳහා ඊයේ (01) කොළඹ  වරායට පැමිණ ඇති බව වාර්තා වේ.

මෙලෙස කොළඹ වරායට පැමිණි Destroyer වර්ගයට අයත් INS Delhi යුද නෞකාව දිගින් මීටර් 163.2 සහ නැව් මුළුව 450 කගෙන් සමන්විත බව සඳහන්.

මෙම නෞකාව නැරඹීම සඳහා පාසල් ළමුන්ට අවස්ථාව ලබා දී තිබෙන අතර මෙය දිවයිනේ රැඳී සිටින කාල සීමාව තුළ නාවික හමුදා අතර සුහදත්වය වැඩි දියුණු කිරීමට වැඩසටහන් මෙන්ම ප්‍රදේශ කිහිපයක සංචාරය කිරීමට ද නියමිතව තිබේ.

එමෙන්ම නෞකාව තුළ පුහුණු හුවමාරු වැඩසටහනක් පැවැත්වීමට සූදානම් කර ඇති අතර මෙම නෞකාව සැප්තැම්බර් මස 3 වන දින දිවයිනෙන් පිටත්ව යන අවස්ථාවේ දී ශ්‍රී ලංකා නාවික හමුදා නෞකාවක් සමඟ බටහිර නාවික විධානයේ මුහුදු තීරයේ දී නාවික අභ්‍යාසවල නිරත වීමට නියමිතව තිබේ.