ප්‍රාග්ධන පාලන රටේ දේශීය විදේශ විනිමය වෙළෙඳපොළේ දක්නට ලැබෙන වැඩිදියුණුවීම් හේතුවෙන්, 2020 අප්‍රේල් මාසයේ සිට විදේශ ප්‍රේෂණ සඳහා මෙතෙක් පනවා තිබූ ඇතැම් සීමාවන් ලිහිල් කරන බව රජය ඊයේ(25) නිවේදනය කර තිබෙන බව වාර්තා වේ .
ඒ අනුව 2023 ජූනි 28 දින සිට මාස හයක් බලපැවැත්වෙන පරිදි නව නියෝගය ශ්‍රී ලංකා මහ බැංකුවේ මුදල් මණ්ඩලයේ සහ ඇමැති මණ්ඩලයේ නිර්දේශය ඇතිව මුදල් ඇමැතිවරයා විසින් මෙලෙස සීමා ලිහිල්කර ඇති බව මහ බැංකුව නිකුත් කළ නිවේදනයකින් සඳහන් කර තිබේ .
නමුත් පසුගිය මාසය මුල කාලයේදී රටේ විදේශ විනිමය සංචිතය ප්‍රමාණවත් මට්ටමට නැවත ගොඩනැංවීම සඳහා ප්‍රාග්ධන පාලනය තවත් මාස හයකින් දීර්ඝ කිරීමට රජය තීරණය කළ අතර 2023 ජූනි මස අග වන විට රටේ විදේශ විනිමය සංචිතය ඩොලර් බිලියන 3.5 ක් පමණ වී තිබිණි.එමෙන්ම විදේශ විනිමය පනතේ 22 වැනි වගන්තිය යටතේ විනිමය අනුපාතිකය මත ඇති වන පීඩනය අවම කර ගැනීමට සහ රටේ විදේශ මුදල් සංචිත ආරක්ෂා කර ගැනීමට කොවිඩ්-19 අගුලු දැමීමේ උච්චතම අවස්ථාව තුළ මෙම සීමාවන් ප්‍රථම වරට හඳුන්වා දුන් අතර එම පනත යටතේ නිකුත් කරන ලද නව නියෝගය මඟින් ප්‍රාග්ධන ගනුදෙනු සඳහා බාහිර ප්‍රේෂණවල යම් යම් සීමාවන් ලිහිල් කර තිබේ.
ඒ අනුව, නව නියෝගය යටතේ, සංක්‍රමණ දීමනාව සඳහා පළමු වරට හිමිකම් පෑම, පෙර ඇණවුම යටතේ ඇමරිකානු ඩොලර් 30,000 සිට උපරිම වශයෙන් ඩොලර් 50,000 දක්වා වැඩි කර තිබෙන අතර සංක්‍රමණිකයන්ගේ වත්මන් ආදායම හෝ සමුච්චිත වත්මන් ආදායම නැවත මෙරටට ගෙන්වා ගැනීම තවදුරටත් කිසිදු සීමාවකට යටත් නොවන බවත් සඳහන් වේ.
මීට පෙර එය ඇමරිකානු ඩොලර් 30,000 ක උපරිමයකට යටත් වී තිබිණි.
