ටින් අංකය (බදු ගෙවන්නන් හඳුනාගැනීමේ අංකය) ලබා නොගතහොත් පෙබරවාරි මස පළමුවැනිදා සිට රුපියල් පනස් දහසක දඩ මුදලක් අය නොකරන බවත්, ටින් අංකය ලබාගැනීම සඳහා ජනතාව හුරු කිරීමෙන් අනතුරුව යම් කාලයකට පසුව ඊට අනුකූලව කටයුතු නොකරන්නන්ට විරුද්ධව දඩ නීතිය ක්‍රියාත්මක කෙරෙන බවත් දේශීය ආදායම් දෙපාර්තමේන්තුවේ කොමසාරිස් ඒ.එම්.නෆීර් පැවසූ බව වාර්තා වේ.
ටින් අංකය ලබාගැනීම සඳහා වයස අවුරුදු 18 ට වැඩි ජනගහනය අතර වැඩි උනන්දුවක් පවතින බවද ඔහු පවසා තිබේ.
බදු නොගෙවන පුද්ගලයින්ට දඩ නියම කිරීම සඳහා දේශීය ආදායම් දෙපාර්තමේන්තු පනතේ ප්‍රතිපාදන තිබෙන බවත්, ටින් අංකය ලබාගැනීම ප්‍රමාද වූවා යැයි පවසා දඩ නියම කිරීමක් සිදුවන බව ඉන් අදහස් නොවන බවත් කොමසාරිස්වරයා සඳහන් කළේය.
ටින් අංකය ලබාගන්නා ආකාරය සම්බන්ධයෙන් ජනතාව හුරු කිරීම සහ දැනුවත් කිරීම දේශීය ආදායම් දෙපාර්තමේන්තුව විසින් මේ වනවිට ආරම්භ කර ඇති බවත්, බදු ගෙවිය යුතු පුද්ගලයින් බදු ගෙවීම පැහැර හරින්නේ නම් අවසන් ආයුධය ලෙස දඩ නියම කිරීම සිදුකරන බවද ඔහු පවසා තිබේ.