සිය සොහොයුරියගේ සැමියා වන ලලිත් කොතලාවලගේ මරණය ස්වාභාවිකව සිදු වූවක් නොව ඔහුගේ දේපළ හිමිකර ගැනීමේ අරමුණින් ඔහු වටා රොක්වූ කණ්ඩායම් දෙකකට අයත් සාමාජිකයන්ගේ ක්‍රියාකාරකම් නිසා සිදු වූ මරණයක් බවට තමා විශ්වාස කරන්නේ යැයි සෙරින් පේෂන් ඉග්මඩැන් ප්‍රනාන්දු විජේරත්න (84) ඊයේ (06) කොළඹ අතිරේක මහේස්ත්‍රාත් පසන් අමරසේන ඉදිරියේ සාක්‍ෂි දෙමින් පවසා ඇත.
වසර 30 – 40ක් තිස්සේ ඔහුට හිතවත්ව සේවය කර ඔහුගේ විශ්වාසය දිනාගෙන සිටි සේවකයන් සේවයෙන් පහකර ඔහුව ප්‍රාණඇපයට ගෙන, රඳවාගෙන සිටි කණ්ඩායම් දෙකක සාමාජිකයන් ඔහුගේ දේපළ අත්පත් කර ගැනීමෙන් පසුව ඔහු තවදුරටත් ජීවත්වීම අනවශ්‍ය යැයි සිතා ස්වභාවික මරණයක් කරා ගෙනයන්නට ඇතැයි මහේස්ත්‍රාත් පරීක්‍ෂණයේදී සාක්‍ෂි දෙමින් ඇය ප්‍රකාශ කර තිබේ.
පදිංචිව සිටි නිවසින් ඉවත් කර කාර්යාල භූමියේ රඳවාගෙන සිටි සිය මස්සිනා වන ලලිත් කොතලාවල සමග නිදහසේ කතාබහ කිරීමට හෝ තමන් ඇතුළු කිසිදු ඥාතියෙක්ට ඉඩ නුදුන් බවත්, සිය ඥාතියාව බැලීමට පිටස්තර කාන්තාවක වන නිරෝෂා ප්‍රියදර්ශනී නමැත්තියගෙන් අවසර ගැනීමට පවුලේ සමීප ඥාතීන්ට පවා සිදු වූ බවත්, ඉංග්‍රීසි – සිංහල භාෂණ පරිවර්තකවරයෙක්ගේ සහාය ඇතිව සාක්‍ෂි දෙමින් ඇය පවසා ඇත.
එලෙස එම කාන්තාවගෙන් අවසර ලබාගෙන හෝ ඔහු සමග කතාකිරීමට අවසර ලැබුණේ විනාඩි කිහිපයක් පමණක් බවත්, එවැනි අවස්ථාවලදී පවා නිරෝෂා ප්‍රියදර්ශනී නමැත්තිය හෝ ආරක්ෂක නිලධාරීන් ඔහු සමග ඥාතීන් සිදුකරන කතාබහ ජංගම දුරකථන මගින් පටිගත කරන බව දක්නට ලැබුණු බවත්, සාක්ෂිකාරිය සඳහන් කරයි.
ගෝල්ඩන් කී සමාගමේ මුදල් තැන්පත් කිරීමට අදාළ නඩු කටයුතු ආරම්භ වීමෙන් පසු ලලිත් කොතලාවල රක්ෂිත බන්ධනාගාර භාරයට පත් වූ බවත්,
ජනාධිපති නීතිඥ රියෙන්සි අර්සකුලරත්නගේ කාර්යාලයේදී ඉදිරි නඩු කටයුතු ගැන සාකච්ඡා කරමින් සිටියදී යතුරු පැදියකින් පැමිණි අපරාධ පරීක්ෂණ දෙපාර්තමේන්තුවේ හා පොලිස් දෙපාර්තමේන්තුවේ සේවය කළ ලලිත් අමරසිංහ සහ ප්‍රියදර්ශන වන්නිආරච්චි නමැති දෙදෙනා නඩු කටයුතු වලට අවශ්‍ය පහසුකම් සපයාදීම සඳහා රුපියල් 10,000 බැගින් ඉල්ලා සිටි බවත්, ඇය පවසා ඇත.
ලලිත් කොතලාවල ඇප ලබා පැමිණි පසු නිරතුරුවම ඔහුගේ නිවසට පැමිණ විටෙක අධිකරණය හමුවේදී ඇපකරුවන් ලෙසට ද ඉදිරිපත් වූ එම පුද්ගලයන් දෙදෙනා ඔහුගේ හිත දිනාගෙන ඔහුගේ නිල කාර්යාලයේ කටයුතු වලට සම්බන්ධ වූ බවත්, ඔවුන් දෙදෙනා සිය මස්සිනාගේ මනස විකෘති කිරීමට පටන් ගෙන තිබූ බවත්, ඇය පවසයි.
ලලිත් කොතලාවල අධ්‍යක්ෂ මණ්ඩල රැස්වීම් පවත්වන අවස්ථා වලදී අධ්‍යක්ෂ මණ්ඩල රැස්වීම් ශාලාව තුළ පවා රැඳී සිටි එම පුද්ගලයන් දෙදෙනා පසු කාලීනව ඔහුට අයත් සමාගම් කිහිපයක අධ්‍යක්ෂවරුන් ලෙස කටයුතු කළේ යැයි ද ඇය පවසා ඇත.
ඉන් වසර දෙකකට පමණ පසු නවක නීතිඥවරුන් වන සමන් ලියනගේ, රීෂ්මි ගොඩැල්ලවත්ත හා දිනේෂ් ජයවීර යන තිදෙනා ලලිත් කොතලාවලගේ කාර්යාලයට පැමිණ ඔහුගේ කටයුතු වලට සම්බන්ධ වූ බවත්, සමන් ලියනගේ නමැත්තාගේ සහෝදරියක වන නිරෝෂා ප්‍රියදර්ශනී නමැත්තිය ද පසුව එම කණ්ඩායමට එක් වූ බවත්, සාක්ෂිකාරිය සඳහන් කර තිබේ.
ලලිත් කොතලාවල පවුලේ අයට අයත් සමාගම්වල සමාගම් ලේකම්වරියක ලෙස රිෂ්මි ගොඩැල්ලවත්ත පසුකාලීනව එක් වූ අතර, මෙකී කණ්ඩායම් දෙකම ඔහුට අයත් දේපළ අත්පත් කර ගැනීමේ පෙර සැලසුමක් ඇතිව ඔහුට සමීප වූ අය වන්නේ යැයි ද සාක්ෂිකාරිය පවසා ඇත.
එමෙන්ම ලලිත් කොතලාවල රඳවා සිටි කාමරය සහ අධ්‍යක්ෂ මණ්ඩලය රැස්වීම් පැවැත් වූ ශාලාව සූර්යාලෝකය පවා නොලැබෙන පරිදි කළුපාට ආලේප වලින් ආවරණය කර තිබූ ස්ථාන බව ඇය පවසා තිබේ.
මෙකී පරිසරයම සිය මස්සිනාගේ මනසට පීඩාකාරී වන අයුරින් සකසා තිබූ අතර, පෙර සමීපව සිටි අය නොව තමන් ඔහුට හිතවත් අය බව ඔහුට පෙන්වීමට ඔවුන් උත්සාහ දැරූ බවත්, පසුකාලීනව දේපළ බෙදා ගැනීම සම්බන්ධයෙන් එම කණ්ඩායම් දෙක අතර ද ගැටුම් ඇති වූ බවත්, ඇය සඳහන් කරයි.
අසනීප වූයේ යැයි කියන ඔහුව එම කාර්යාලය අසල පිහිටි ඩර්ඩන්ස් රෝහලට ඇතුළත් නොකොට නාරාහේන්පිට ප්‍රදේශයේ පිහිටි රෝහලකට දුර බැහැර ගෙවා රැගෙන ඒම මෙන්ම ඒ පිළිබඳ ලැබුණු තොරතුරු අනුව තමා සහ සිය දියණිය රෝහලට යන විට එහි සිටි නිරෝෂා ප්‍රියදර්ශනී නමැත්තිය තමන්ට මුහුණ නොදී සැගවුණු බව ද සාක්ෂිකාරිය පවසා ඇත.
ඇය ඔහුගේ ඇසුරට පැමිණි සමයේ ඔහු ඇයට මහරගම ප්‍රදේශයේ පිහිටි නිවසක් පවා මිලදී ගෙන තිබූ බවත්, ඔහුගේ ඥාති දියණියන් දෙදෙනෙක් ඔහු රෝහල්ගත කිරීමට දින දෙකකට පෙර ඔහුව දැකීමට යන විටත් ඔහු යහපත් සෞඛ්‍ය තත්ත්වයෙන් පසු වූ බව දැන ගන්නට ලැබුණු බවත්, ඇය සඳහන් කරයි.
මෙම මරණය නිව්මෝනියා රෝග තත්ත්වය උත්සන්න වීමෙන් සිදු වී ඇති බවට බම්බලපිටිය පොලිසිය ජනමාධ්‍යයට ප්‍රකාශ කර ඇති බවත්, අධිකරණ වෛද්‍ය නිලධාරීන් විසින් මරණයට හේතුව ප්‍රකාශයට පත් කර නොතිබියදීත් පොලිසිය එලෙස ජනමාධ්‍යයට පැවසීම සහ අනෙකුත් කරුණු අනුව එම මරණය සිය වාසියට හරවා ගැනීමට නිරතුරුවම උත්සාහ දරන පෙර කී කණ්ඩායම් දෙක හා පොලිසිය එකී මරණය සිදු වූ ආකාරය යටපත් කිරීමට උත්සාහ දරන බවක් තමන්ට හැඟී ගිය බවත්, සාක්ෂිකාරිය පවසා ඇත.
වැඩිදුර මහෙස්ත්‍රාත් පරීක්ෂණය අද (07) දක්වා කල් තැබිණි.
(දිවයින)