මේ දිනවල මහනුවර දළදා මාළිගාවේ පැවැත්වෙන ඇසළ පෙරහැර මංගල්‍යය ප්‍රචාරය කිරීමේ නිල අයිතිකරුවන් බවට පත්ව සිටින්නේ දළදා මාළිගාවේ දියවඩන නිළමේවරයා යටතේ පවතින මාධ්‍ය ඒකකයයි. 2005 වසරේ සිට මෙම මාධ්‍ය ඒකකය මඟින් කිසිදු පිටස්තර මාධ්‍ය ආයතනයකට මෙම පෙරහැර ප්‍රචාරය කිරීමට ඉඩ සලසා නොදෙන අතර එය ප්‍රචාරණය කළ යුත්තේ ඔවුන් හරහා යැයි කියමින් තහනමක් ද පනවා තිබේ. පසුගිය 26 වන දා ශ්‍රී ලංකා නිව්ස් වෙබ් අඩවිය හරහා දළදා මාළිගා පෙරහැර සජීවීව විකාශනය කරමින් සිටියදී රාත්‍රී 9.40 ට පමණ 076 7464556 යන දුරකථන අංකය හරහා දළදා මාළිගාවේ මාධ්‍ය ඒකකයේ අයෙකු කතාකර පෙරහැරේ සජීවී විකාශය වහාම නවතා දමන ලෙස තර්ජනය කර තිබුණි.
මේ සම්බන්ධයෙන් අස්ගිරි මහා විහාර පාර්ශවයේ පුත්තලම් මහ දිසාවේ ප්‍රධාන සංඝනායක , සාහිත්‍ය කීර්ති ශ්‍රී සුමන සරණංකර , ශාස්ත්‍රපති , පූජ්‍ය මිගෙට්ටුවත්තේ සුමිත්ත නාහිමිපාණන් වහන්සේ විසින් මහභාරකාර දෙපාර්තමේන්තුවේ මහභාරකාරතුමා වෙත ලිපියක් යොමු කරමින් පැමිණිලි කර තිබේ.
පූජ්‍ය මිගෙට්ටුවත්තේ සුමිත්ත නාහිමිපාණන් වහන්සේ එම ලිපිය මඟින් පෙන්වා දී තිබෙන්නේ ඉහතින් සඳහන් කළ තහනම් පැනවීමට දළදා මාළිගාවේ මාධ්‍ය ඒකකයට කිසිදු අයිතියක් නොමැති බවත් , 1980 අංක 34 දරණ ඇසළ පෙරහැර භාරය පනත අනුව සතර මහ දේවාල ඇතුළු දළදා පෙරහැර සඳහා කිසිදු ආකාරයක මුදල් එකතු කිරීමක් කළ නොහැකි බවත් , එසේ එකතු කරන්නේ නම් රජයේ මහභාරකාරවරයාගෙන් ලිඛිත අවසරයක් ගත යුතු බවත් , එසේ නොකර මුදල් එකතු කිරීම දඬුවම් ලැබිය හැකිවරදක් බවත් ය.
එමෙන්ම නාහිමිපාණන් වහන්සේ මහභාරකාරවරයා හට මෙම ලිපියෙන් වැඩි දුරටත් ප්‍රකාශ කර තිබෙන්නේ මහභාරකාරතුමාගේ අවසරයකින් තොරව පෙරහැර ප්‍රචාරය කිරීම සඳහා දළදා මාළිගාවේ මාධ්‍ය ඒකකය මුදල් රැස් කළේ කෙසේ ද යන්න සම්බන්ධයෙන් සොයා බලන ලෙසත් , ඒ සඳහා මහභාරකාරතුමාගේ අවසරය දුන්නේ ද යන්න දැනගැනීමට සලස්වන ලෙසත් ය.
අදාළ ලිපිය පහතින් ,
මහ භාරකාරතුමා
මහ භාරකාර දෙපාර්තමේන්තුව
කොළඹ.
මහභාරකාර තුමනි,
දළදා මාලිගාවේ මාධ්‍ය ඒකකය සම්බන්ධයෙනි.
මේ දිනවල මහනුවර දළදා මාලිගාවේ පැවැත්වෙන ඇසළ පෙරහර ප්‍රචාරය කිරිමේ නිල අයිතිකරුවන් බවට බලහත්කාරයෙන් පත්ව සිටින්නේ දළදා මාලිගාවේ දියවඩන නිලමේවරයා යටතේ පවතින මාධ්‍යය ඒකකයයි.2005 වසරේ සිට මෙම මාධ්‍ය ඒකකය මගින් කිසිදු පිටස්තර මාධ්‍ය ආයතනයකට මෙම පෙරහර ප්‍රචාරය කිරිමට ඉඩ සලසා නොදෙයි.එය ප්‍රචාරය කළ යුත්තේ ඔවුන් හරහා යැයි තහංචියක්ද දමා තිබේ.
2023.08.26 වන දින සිය මාධ්‍යයෙන් පෙරහර සජිවිව විකාශය කරමින් සිටි ශ්‍රී ලංකා නිව්ස් වෙබ් අඩිවියට එදින රාත්‍රි 9.40ට පමණ 0767464556 අංක දරණ දුරකතන අංකයෙන් කතාකළ දළදා මාලිගාවේ මාධ්‍ය ඒකකයේ අයකු පෙරහර සජිවි විකාශය වහාම නවතා දමන ලෙස තර්ජනය කර ඇතැයි ප්‍රවෘත්ති පළවි තිබිණ.
මෙවැනි තහංචියක් දැමිමට දළදා මාලිගාවේ මාධ්‍ය ඒකකයට කිසිදු අයිතියක් නොමැත.
1980 අංක 34 දරණ ඇසළ පෙරහර භාරය පනත අනුව සතර සහ දේවාල ඇතුළු දළදා පෙරහර සඳහා කිසිදු ආකාරයකින් මුදල් එකතු කිරිමට නොහැක.එසේ එකතු කරන්නේනම් රජයේ මහ භාරකාරවරයාගෙන් ලිඛිත අවසරයක් ගතයුතුය.එසේ නොකර මුදල් එකතු කිරිම දඬුවම් ලැබිය හැකි වරදකි.
දළදා මාලිගාවේ මාධ්‍ය ඒකකය මගින් ප්‍රචාරය කරන්නේ දළදා පෙරහරයි.එසේ ඔවුන් පෙරහර සජිවි ලෙස ප්‍රචාරය කරනවිට මෙන්ම පෙරහරෙන් පසු ප්‍රචාරය කරන ස්තුති සටහනටද විවිධ ආයතනවල ලාංජන ඇතුළත් කර තිබෙනු දක්නට ලැබේ.එසේ ආයතනවල ලාංජන ප්‍රචාරය කිරිමට අධික මුදලක් මාධ්‍ය ඒකකයෙන් ලබාගන්නා බව පැහැදිලිය.ඔවුන්ට එසේ කිරිමට අවසර දුන්නෙ කවුරුන්ද යන්න ප්‍රශ්නයකි.
මාධ්‍ය ඒකකය විසින් දළදා පෙරහර මේවනවිට ව්‍යාපාරයක් කරගෙන ඇති බව පෙනේ.ඔවුන් ප්‍රචාරය කරන්නේ දළදා පෙරහර නිසා එහි ප්‍රචාරක කටයුතු සදහාද 1980 අංක 34 දරණ ඇසළ පෙරහර භාරය පනත අනුව මුදල් රැස්කළ නොහැකිය.
මාලිගාවේ මාධ්‍ය ඒකකය විසින් මුදල් රැස්කරන ආයතනවල ලාංජනද සහිතව පෙරහර සජිවිව විකාශය කරන නිසා වෙනත් මාධ්‍ය ආයතනයකින් පෙරහර ප්‍රචාරය කිරිමට ඔවුන් ඉඩ නොදේ.එසේ කළහොත් එහි නිලධාරින් තර්ජනය කරන බව පසුගිය 27 වැනිදා කළ තර්ජනයෙන්ම පැහැදිලිවේ.
අවසන් රන්දෝලි පෙරහරදා අනෙක් මාධ්‍ය විසින් එය සජිවිව ප්‍රචාරය කළයුත්තේ මාලිගාවේ මාධ්‍ය ඒකකය හරහාය.ඒ සදහාද ඔවුන් මුදල් අයකරනු ඇතැයි අප තුළ සැකයක් පවති.
දළදා මාලිගා අරමුදලින්ද මාධ්‍ය ඒකකයක් පවත්වාගෙන යා නොහැකිය.එසේ කරන්නේනම් ඒ සදහාද බෞද්ධ කටයුතු කොමසාරිස් ජනරාල්වරයාගේ විශේෂ අවසරය තිබිය යුතුය.
මහභාරකාරතුමාගේ අවසරයකින් තොරව පෙරහර ප්‍රචාරය සදහා මාලිගාවේ මාධ්‍ය ඒකකය මුදල් රැස්කළේ කෙසේද යන්න සොයා බලන ලෙසත්,මේ සදහා ඔබතුමා අවසර දුන්නේද යන්න දැනගැනිමට සලස්වන ලෙසත් ඔබතුමාගෙන් කාරුණිකව ඉල්ලා සිටිමි.
මිගෙට්ටුවත්තේ සුමිත්ත නාහිමි
පුත්තලම් දිසාවේ ප්‍රධාන සංඝනායක