සංචාරක කලාපවලට මෘදු මත්පැන් බලපත්‍ර නිකුත් කිරීමට අදාළව විෂය භාර අමාත්‍යවරයා විසින් නිකුත් කර තිබෙන ගැසට් නිවේදනයේ අන්තර්ගත නිර්නායකයන්ට අනුකූලව මත්පැන් බලපත්‍ර නිකුත් කිරීමට වග බලා ගන්නා බව සුරාබදු කොමසාරිස් ජනරාල්වරයා අද (24) අභියාචනාධිකරණය හමුවේ ප්‍රතිඥාවක් ලබා දුන් බව වාර්තා වේ .
සංචාරක කලාප සඳහා නිකුත් කළ යුතු මෘදු මත්පැන් බලපත්‍ර ඊට පරිබාහිර ප්‍රදේශයවලට නිකුත් කර ඇතැයි චෝදනා කරමින් ගොනුකර තිබූ රිට් පෙත්සම් දෙකක් අද (24) කැඳවූ අතර එහිදී සුරාබදු කොමසාරිස් ජනරාල්වරයා වෙනුවෙන් පෙනී සිටි නියෝජ්‍ය සොලිසිටර් ජෙනරාල් කණිෂ්කා සිල්වා මහත්මිය විසින් මෙම ප්‍රතිඥාව ලබා දී තිබේ.
අදාළ ගැසට් නිවේදනය අභියෝගයට ලක් කරමින් ශ්‍රී ලංකා රටබීම හල් බලපත්‍ර හිමියන්ගේ සංගමය ඇතුළු පාර්ශව දෙකක් ගොනුකළ පෙත්සම් අද (24) අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න සහ චමත් මොරායස් යන මහත්වරුන්ගෙන් සමන්විත විනිසුරු මඩුල්ල ඉදිරියේ කැදවනු ලැබීය.