කලාවැව ආශ්‍රිත ජල පෝෂක කලාපවලට ඇද හැලෙන වර්ෂාවත් සමග අද සවස කලාවැවේ හදිසි වාන් දොරටු දෙක අඩි 06 බැගින් විවෘත කිරීමට බෝවතැන්න වාරි ඉංජිනේරුවරයාගේ උපදෙස් මත කලාවැව ජලාශ බාර කාර්යාලය කටයුතු කරනු ලැබූ බව වාර්තා වේ.
මේ වනවිට කලාවැවේ සමස්ථ ජලධාරිතාවය අක්කර අඩි 86916ක්ව තිබේ.
ඒ අනුව මේ වනවිට කලාවැව පිටාර ගැලීමද සිදුවෙමින් පවතී. ඒ අනුව කලාවැවේ හදිසි වාන්දොරටු විවෘත කිරීමත් සමග කලාවැවෙන් කලාඔයට මුදා හැරෙන ජලප්‍රමාණය තප්පරයට ඝන අඩි 6300ක් පමණ වන බවට බෝවතැන්න හා කලාවැව බාර කාර්ය භාර ඉංජිනේරු බුද්ධික මහේෂ් නවරත්න මහතා ප්‍රකාශ කර තිබේ.
මෙහිදී කලාවැව ජලාශයද ඉංජිනේරුවරයාගේ නිරීක්ෂණයට ලක්විය.
ඉංජිනේරුවරයා වැඩි දුරටත් පවසා සිටියේ රාත්‍රිය වනවිට තවදුරටත් වාන්දොරටු විවෘත කිරීමට සිදුවිය හැකි බවයි.
කලාවැව හදිසි වාන්දොරටු විවෘත කිරීමත් සමග මේ වනවිට කලාවැව අවුකන මාර්ගයද අවුකන විහාරස්ථානය ආසන්නයේදී ජලයෙන් යටවී ඇති අතර එම මාර්ගයේ ගමනාගමන කටයුතු ද මේ වනවිට ඇනහිට තිබේ.