මෑතකදී නැගෙනහිර පළාත් ආණ්ඩුකාර ධූරයට පත් කරන ලද සෙන්දිල් තොණ්ඩමන් මහතා ආණ්ඩුක්‍රම ව්‍යවස්ථාව සහ තම බලය අභිබවා කටයුතු කිරීම සම්බන්ධයෙන් අර්බන් සිටිසන් සංවිධානයේ සභාපතිනි ශර්මිලා ගෝනවෙල විසින් අධිකරණ , බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍ය , ජනාධිපති නීතීඥ , ආචාර්ය විජයදාස රාජපක්ෂ මහතා වෙත ලිපියක් යොමු කර තිබේ .
එම ලිපියේ සඳහන් කර ඇත්තේ නැගෙනහිර පළාත් ආණ්ඩුකාර සෙන්දිල් තොණ්ඩමන් මහතා පළාත් සභාව සතු බලතල අභිබවා පමණක් නොව ජනාධිපති බලතල ද නොසලකා අත්තනෝමතික ලෙස ක්‍රියා කරමින් , අනවශ්‍ය තත්ත්වයන් ඇති කිරීම සහ රජය කෙරෙහි ඇති ජනතා විශ්වාසය බිඳ වැටීමට හැකි අයුරින් ක්‍රියා කරන බවයි.
එමෙන්ම භූ විද්‍යා හා පතල් කැණීම් කාර්‍යාංශයෙන් නැගෙනහිර පළාතේ සිදු කරන කැණීම් කටයුතු අත්හිටුවන ලෙසට නියෝග කිරීම සහ බොරලුකන්ද රජමහා විහාරයේ සංවර්ධන කටයුතු අත්හිටුවීම වැනි නීතිය අභිබවා කරන කටයුතු සම්බන්ධයෙන් අවධානය යොමුව ඇති බවත් , රටේ ව්‍යවස්ථාව උල්ලංඝනය කිරීම , ජාතික ආරක්ෂාවට තර්ජනයක් සහ ජනාධිපතිතුමන් විසින් පවරන ලද බලය අවභාවිතා කිරීමක් සිදු කර ඇති බවත් මෙම ලිපිය මඟින් පෙන්වා දී තිබේ.
ඒ අනුව මෙම ලිපිය මඟින් අර්බන් සිටිසන් ආයතනය විසින් ජනාධිපති නීතීඥ ආචාර්ය විජයදාස රාජපක්ෂ මහතා හට වැඩි දුරටත් පවසා ඇත්තේ පළාත් සභාවකට නොමැති ශක්තියක් හා ස්වාධීනත්වයක් ලබා දෙමින් ෆෙඩරල් ආණ්ඩුවක් ලෙස ක්‍රියාත්මක වෙමින් මධ්‍යම රජය සතු බලය මෙලෙස හීන වීමට ඉඩ හැරීම සම්බන්ධයෙන් අධිකරණ අමාත්‍යවරයා ලෙස අවධානය යොමු කරන ලෙසටයි.
අදාළ ලිපිය පහතින් ,
07.09.2023
ගරු ජනාධිපති නීතිඥ (ආචාර්ය) විජයදාස රාජපක්ෂ මහතා, අධිකරණ, බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍යතුමා, අධිකරණ, බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍යාංශය, 19, ශ්‍රී සංඝරාජ මාවත,
කොළඹ 10.
නැගෙනහිර පළාත් ආණ්ඩුකාර තුමා විසින් ආණ්ඩුක්‍රම ව්‍යවස්ථාව සහ තම බලය අභිබවා කටයුතු කිරීම.
අධිකරණ අමාත්‍යතුමනි,
මෑතකදී නැගෙනහිර පළාත් ආණ්ඩුකාර ධූරයට පත් කරන ලද සෙන්දිල් තොණ්ඩමන් මහතා පළාත් සභාවක් සතු බලතල අභිබවා පමණක් නොව ජනාධිපති බලතලද නොසලකා හැරීම පිළිබඳව අදාල පළාතේ පමණක් නොව රටේම අවධානයට ඔහු ලක්ව ඇති අතර සෙන්දිල් තොණ්ඩමන් ආණ්ඩුකාරවරයෙකු ලෙස මෙලෙස අත්තනෝමතික ලෙස ක්‍රියා කිරීම අනවශ්‍ය තත්වයන් ඇති කිරීම හා රජය කෙරෙහි ජනතා විශ්වාසය බිදවැටිමද සිදු විය හැක.
සෙන්දිල් තොණ්ඩමන් ආණ්ඩුකාර ධූරයට පත්වී කෙටි කලක් තුළ මොහු නීතිය අභිබවා ක්‍රියාකිරීම පිළිබඳව අපගේ අවධානය යොමුවූ කරුණු දෙකකි.
1)භූ විද්‍යා හා පතල් කැණීම් කාර්යංශයෙන් නැගෙනහිර පළාතේ සිදුකරන කැණීම් කටයුතු අත්හිටුවන ලෙසට නියෝග කිරීම.
2) බොරලුකන්ද රජමහා විහාරයේ සංවර්ධන කටයුතු අත්හිටුවීම.
ආණ්ඩුකාරවරයෙක් පත්කරනු ලබන්නේ ජනාධිපතිවරයා විසින් වීමත්, භූ විද්‍යා හා පතල් කැනීම් පිළිබඳ තීරණ ගැනීම මධ්‍යම රජය සතු බලයක් වන අතර පළාත් විෂය පථයට කිසිසේත් අදාළ නොවන විෂයක් සම්බන්ධයෙන් මෙසේ අත්තනෝමතික ලෙස ක්‍රියා කිරීමට ඉඩ හැරීම තුලින් පැහැදිළි ලෙසම 13වන සංශෝධනය තුළින් පළාත් සභා වෙත ලබා දී ඇති බලය අභිබවා කටයුතු කිරිම හා ජනාධිපති බලතල නොසලකා හරිමින් කටයුතු කිරීමක් ලෙස අපි දකිමින් මෙය ඉතාමත් වැරදි සහ භයානක පූර්වාදර්ශයක් විය හැකි බවද පෙන්වා දීමට කැමැත්තෙමු.
ජනාධිපතිතුමන් විසින් පත් කරන ලද ආණ්ඩුකාරවරයෙක් මෙසේ ජනාධිපති සතු බලය හා රටේ ව්‍යවස්ථාවෙන් පළාතට පවරා ඇති බලය අභිබවා කටයුතු කිරීමේදී ජනාධිපතිතුමන් ප්‍රමුඛ රාජය සෘජු නියෝගයන් ලබා දෙනවා වෙනුවට භූ විද්‍යා හා පතල් කැනීම් කාර්යාලයට අභියාචනාධිකරණයේ පිහිට පැතිමට ඉඩ හැරිම ඉතාමත් නුසුදුසු ක්‍රියාවක් ලෙස පෙන්වා දෙමින් අනාගතයේදී පළාතක් ලෙස වෙන්වී යෑම දක්වා වර්ධනය විය හැකි අනවශ්‍ය වැරදි පූර්වාදර්ශයක් ලෙසද අප පෙන්වා දීමට කැමැත්තෙමු.
නැගෙනහිර පළාත් ආණ්ඩුකාරවරයා විසින් රටේ ව්‍යවස්ථාව උල්ලංඝනය කිරීම, ජාතික ආරක්ෂාවට තර්ජනයක්,ජනාධිපති තුමන් විසින් පවරන ලද බලය අවභාවිතා කිරීමක් සිදුකර ඇති බව පෙන්වා දීමට කැමැත්තෙමු.
නැගෙනහිර පළාතේ පුරාවස්තු විනාශ කිරීම, අනීතිකව ඉඩම් බෙදාදීම, රක්ෂිත වනාන්තර විනාශ කිරීම, ආගමික සහජීවනයට තර්ජනයක් ඇති වන ක්‍රියාකාරකම් සහ ප්‍රකාශයන් සිදු කිරීම යන මේ සියලු කරුණු පදනම් කරගෙන අන්‍යෝන්‍ය විශ්වාසය බිඳ වැටී අනවශ්‍ය ගැටුම් ඇතිවීමට ඉඩ නොතබා නිසි ක්‍රියාමාර්ග ගනු ඇතැයි යන විශ්වාසය මත අප මෙසේ ඔබ වෙත ලියා දන් වන්නෙමු.
පළාත් සභාවකට නොමැති ශක්තියක් හා ස්වාධීනත්වයක් ලබා දෙමින් ෆෙඩ්රල් ආණ්ඩුවක් ලෙස ක්‍රියාත්මක වෙමින් මධ්‍යම රජය සතු බලය මෙසේ හීන වීමට ඉඩ හැරිම පිළිබඳව අධිකරණ අමාත්‍යවරයා ලෙස ඔබගේ අවධානය යොමු කරන ලෙස ඉතාමත් ඕනෑකමින් යුතුව අප සංවිධානය ඔබගෙන් ඉල්ලා සිටිමු
තෙරුවන් සරණයි!
මෙයට ,
ශර්මිලා ගෝනවෙල
අර්බන් සිටිසන් සංවිධානයේ සභාපතිනි
0742420366